WASHINGTON DC - Amapholisa akoBulawayo ngoMgqibelo avimbe ukufola ezitaladeni obekuqoqwe ngabalwa impi yenkululeko bekuviyo leZipra, ngenjongo yokukhumbula owayengumkhokheli wabo uMnu Joshua Mqabuko Nkomo.
Lanxa amapholisa ale ukukhuluma leStudio 7, abantu laba bathe bavinjwe ngesizatho sokuthi bebeqgoke izikipa ezilithanga, okungumbala weZapu osetshenziswa njalo libandla leCCC.
AbeZipra laba babuthene esithombeni sikaNkomo enzikini yedolobho kodwa amapholisa aphange atheleka engasadlanga nkotshana avimba loluhlelo.
“Siqale sacela emapholiseni ukuba sibe lapha asibizela emahofisini awo sayalungiselwa konke lezingcwadi. Kodwa okusimangalisileyo yikuthi sithe sesifika samiswa kwathiwa akusafanelanga singene edolobheni,” kutsho isikhulumeli seZipra, uMnu Buster Willy Magwizi.
Amazwi kaMagwizi agcizelelwe ngunobhala jikelele weZipra uMnu Petros Sibanda, othe “besikhangelele ukuthi kuzakuba kuhle sigqoke ngendlela esiyifunayo.”
UNkomo wabhubha mhlaka 1 kuNtulikazi ngomnyaka ka1999, engumsekeli kaMongameli welizwe, okwazwisa abantu abanengi usizi ngenxa yobukhokheli bakhe obabubambanisa abantu engakhethi mhlobo.
Uzulu weZimbabwe ubambene emkhumbula ngoLwesihlanu.
Your browser doesn’t support HTML5
Udaba Siluphiwa nguBathabile Masuku