Bulawayo..............
Lusuku lwesithathu abezempilakahle bekhalala umsebenzi emaklilinika lezibhedlela. Abongi abambalwa yibo abenelisayo ukuya emsebenzini ikhakhulu abasafundela umsebenzi koBulawayo. Abongi balwisa ukuthi iholo labo balithole ngedola leMelika ngoba kusetshenziswa lona endaweni zonke elizweni.
Abasebenza kungatsha ezitshiyeneyo kwezempilakahle ezibhedlela zikahulumende bakhala ngokuthi iholo labo aleneli ukubaphilisa ngakhoke kungcono baholiswe ngedola leMelika.
Umnunzana Anthony Majongosi umgcinisihlalo weZimbabwe Nurses Association esibhedlela seUnited Bulawayo Hospital uthi baqhubekela phambili ngokungayi emsebenzini ngoba bengela mali.
“Sibone ukuthi I government isifakele imali yakhona ayikwani ukuthi sihambe emsebenzini, sacina sisenza ama meeting layo siyitshela ukuthi asikwanisi ukuhamba emsebenzini ngendaba yokuthi imali ayikwani ukuthi siyemsebenzini kodwa I government iqhubekela phambili isithi ayilamali thina sifuna idollar leAmerica ngoba yiyo imali esebenzayo khathesi. Siqhubekela phambili sisithi asikwanisi ukuthi siyemsebenzini,ezibhedlela amanurse malutshwane ngoba bengakwanisi ukuthi sihambe.”
Unkosikazi Mongiwa Mathema umongi kwesinye sezibhedlela koBulawayo uthi iholo labo lincane kakhulu okwenza behluleke ukunakekela imuli zabo.
"Okwenzakalayo kithi kunzima ngoba khathesi nxa sikhangela ukukhwela kwezinto lemali esiyitholayo kunzima ngoba silezimuli kunengi okudingakalayo kugoqela indawo yokuhlala. Isifiso sethu yikuthi uhulumende asizwisise asizwele ngoba uyakwazi ukuthi inflation injani lomkhonomi wethu yikho esikufunayo thina yimali ethengayo.”
Unkosikazi Langelihle Sibanda isakhamuzi sakoBulawayo obeyekwelatshwa esibhedlela esikhulu seMpilo uthi umumo awufice khonale uyethusa.
“Okusesibhedlela kunzima njalo Kubuhlungu ngoba esibhedlela nxa ungalaliswanga akudingeki ukuthi uthathe isikhathi eside ulapho, kodwa ekukhona kunzima ngoba odokotela balutshwane elindelwe ngabantu abanengi okuyingozi kithi ngesikhathi lesi seCovid 19. lsikhathi sesiside abezempilakahle bekhonona ngeholo uhulumende uyakwazi okokuthi ngabe uselungisisa abantu bathole abakufunayo.”
Ngasikhathi sinye abezempilakahle esibhedlela seParirenyatwa eHarare balokhe betshengisela kodwa namhlanje bavinjwe ngamapholisa ukuthi babhode egumeni lesibhedlela.
UDokotela Denford Masona unobhala jikelele wenhlanganiso eyeZimbabwe Hospital Doctors Association utshele iStudio 7 ukuthi izikhalazo zabo lokhe zingakaphendulwa.
“Siyakhonona ngendlela zokusebenza ikakhulu esibhedlela esikhulu seParerenyatwa,kwesinye isikhathi kuyaswelakala imithi, lemitshina yokusebenzisa ifile.Asilwi njalo asikho kwezepolitics, siyesaba kodwa kukhona okumele keenziwe ngoba sithwele nzima kukuze basizwe njalo lezigulane aziselatshwa ngendlela efaneleyo.”
Izisebenzi ezibhedlela ziqale ukukhalala umsebenzi ngoMvulo ngemva kokwala isilinganiso seholo abasifakelwe nguhulumende besithi aseneli ngenxa yokukhuphuka kwentengo yento yonke elizweni. Abezempilakahle bathi bafuna iholo labo libuyiselwe kudola leMelika bethi umumo womnotho awusavumi ukuthi behole idola leZimbabwe eligugudeka isisindo nsukuzonke.
Umongameli weZimbabwe Nurses Association umnunzana Enock Dongo uthe inengi labongi lithola iholo elingaphansi kwamadola eMelika alikhulu US$100 ekupheleni kwenyanga.
Imizamo yokuxhumana lomnginisihlalo weZimbabwe Health Service Board (HSB) udokotela Paulinus Sikhosana yehlule ngoba ubengaphenduli ucingo lwakhe.