Abantu abanengi eZimbabwe bathi bethuswa ludlakela oluqhamuke phakathi kwebandla leZanu PF leCitizens Coalition for Change kulandela ukubulawa kwamalunga eCCC ngabacatshangelwa ukuba ngabalandeli bebandla elibusayo.
Ukubulawa kwamalunga eCCC - uNkosikazi Moreblessing Ali, uLangelihle Zonda Moyo loEdson Chinembiri - sokwenze kwaba lokuxokozela okumangalisayo eZimbabwe osokubotshwe uMnu. Job Sikhala loMnu. Godfrey Sithole, okuthiwa batshotshozela udlakela.
Kubotshwe njalo uPius Jamba, okuthiwa wabulala uNkosikazi Ali esithi wadliwa imali enengi ngumuyi engakehlukani laye. Kucatshangelwa ukuba abathathu laba babulawa ngamalunga ebandla elibusayo. Kodwa ibandla leZanu PF liyakuphika lokhu.
Akwaziwa ukuba uzangcwatshwa nini uNkosikazi Ali. Omunye wabasekeli besikhulumeli sebandla leCCC, uMnu. Felix Magalela Mafa, uthi uzulu usethwele amagabha avuzayo.
“NgesiNdebele sithi zimkhize, zimkhelele. Lokhu sekuyihlalakwenza, abantu abasazi ukuthi bazakwenzani, bahlala bebambe umlomo wangaphansi ngenxa yokuthi akusela security, akusela ukuvikela kwabantu eZimbabwe. Lokhu kukhombisa ukuthi vele akulunganga. Sifelwe ngu Ali, uMoreblessing, labanye abantu abanengi engingake ngabaqamba silabo Nyamanyana, silabantu abacatshayo, abanye lalamuhla lokhu, oItayi … Kutshengisa ukuthi into lezi vele zizahamba kabi.”
Kodwa uMnu. Malaki Nkomo, okubandla leZanu PF, uyakulandula lokhu.
“Akula loba ilanga elilodwa okwake kwaba khona imibuthano yokuthi abantu abahambe beyetshaya abantu kumbe bathunywe ukuthi basebenzise udlakela kumbe libulale abantu, akulanto enjalo. Okufanele sikuzwisise yikuthi kulabantu abangafika phakathi kwamabandla bejonge ukuzongcolisa ibandla lona ibandla lingekho kukho lokho. Thina umongameli wethu owebandla leZanu PF, usemile phambi kwabantu wakhuluma ukubana into zomsindo tshiyanani lazo, akufunakali. Ukhetho alube khona ngokuthi umuntu ungene ngokufunwa ngabantu hayikhona ngokuthi kube lodlakela.”
UMnu. Patrick Ndlovu, umgcinincebo webandla leGeneral Economic Transformation, uthi akulunganga okwenzakala eZimbabwe.
UNkosikazi Rosline Gwese, isikhulumeli sebandla leLabour Economists and African Democrats, uxwayisa abamabandla ezombusazwe ukuba behlukane lomkhuba wokungenisa ezombusazwe ezimfeni.
“Abatshiye amapholisa enze umsebenzi wawo sibone ukuthi kuyini okuphumayo sibili, sibone ukuthi khona bambulaleleni abeZanu PF, kade befunani, kade elani sibili okungabaphambanisa abantu beZanu PF, ukuthi baze bambulale … Umuntu weCCC sibili engaze eyenze ingozi emgwaqweni, kuthiwa kade befuna ukumbulala. Angikwazi ukuthi bona abasayenzi yini ama-accidents, bona abasafi yini abantu beCCC ngokuthi ngabeCCC.”
Uzulu ubambe owangaphansi ngodlakela olwenzakala elizweni. UMnu. Yohane Phiri ukhuthaza abezomthetho ukuba benze umsebenzi wabo ngemfanelo.
“Ukuthunjwa kwabantu, ukubulawa kwabantu, ukutshayana, ukutshiselana izindlu usinceda ngani thina? Kutsho ukuthi akusamelanga vele siphikisane, imibono yethu simele ifanane kuphela ngenkani. Kambe yikukhululeka bani khonokho? Hayi, thina vele lokho asikufuni vele, sithi akume, amapholisa makayenze umsebenzi wabo, ayekele ukuba ku-side yeZanu kuphela makayenze umsebenzi njengomsebenzi. Kuqala ngabo bona, bayenze umsebenzi, babonakale ukuba ba-neutral, otherwise udlame lolu luyaqhubeka lusiya phambili and abantu abanengi bazalimala sibili.”
Isikhulumeli samapholisa, uAssistant Commissioner Paul Nyathi, uxwayisa inkokheli yamabandla wonke ukuba iziphathe sonke isikhathi.
“Nxa bekhuluma akumelanga bayenze lokhuyana esithi thina uku-inciter i-violence njalo bancede amapholisa lama-journalist ukuthi kube lokuthula kakhulu nxa sikhangele ukuba lama-good relations.”
Abacatshangelwa ukuba ngamalunga ebandla leZanu PF ngoLwesihlanu batshaye ngamatshe imota kaMnu. Tendai Biti, okubandla leCCC, eMashonaland Central. Kukhanya engani kuzakuba lodlakela olumangalisayo kusiyafika ukhetho oluzayo.
SEE ALSO:
Bathithibele Abantu Ngodlakela eZimbabwe