Amapholisa asebophe uPius Jamba, okucatshangelwa ukuba wabulala obelilunga leCitizens Coalition for Change (CCC), uNkosikazi Moreblessing Ali, eNyatsime esigabeni seBeatrice.
Amapholisa, ethule umbiko lo ebulenjini bokuxhumana obeTwitter, athi uJamba ubotshwe namuhla ekuseni.
Kucatshangelwa ukuba wabulala uNkosikazi Ali, wamqumaquma umzimba wasephosela isidumbu sakhe emthonjeni wamanzi ongasetshensizwayo duzane lomuzi wangakibo eNyatsime.
UJamba, okubikwa ukuthi ulilunga lebandla leZanu PF, obedingwa ngamapholisa. Umsakazo weSABC ubika ukuba uzihambise emapholiseni.
Kasenelisanga ukukhuluma ngodaba lolu lesikhulumeli samapholisa, uAssistant Commissioner Paul Nyathi, obengaphenduli umakhalekhukhwini.
Kusenjalo, uNkosazana Fadzayi Mahere, isikhulumeli sebandla leCCC, uthi sokubulewe njalo uMnu. Champion Edison Chinembiri, obelilunga lebandla leli eZengeza.
UMahere kavezanga ukuba uChinembiri ubulewe ngubani. Kucatshangelwa ukuthi ugongodwe ngamalunga ebandla elibusayo.
Kusenjalo, uMnu. Job Sikhala loMnu. Godfrey Sithole, ababotshwe ngoMvulo besetheswa amacala okutshotshozela udlakela, bakhangelelwe ukuba bazamiswa emthethwandaba namuhla.