HARARE - Ibandla leCitizens Coalition for Change (CCC) lithi abasekeli beZanu PF ngoMvulo bahlasele ebantu bebuthene esililweni selunga lalo, uMoreblessing Ali, njalo bathumba abantu abangamatshumi amabili, 20, inengi kungabesifazana baphinda baxotsha izihlobo zomufi.
Abebandla leZanu PF baqale ubudlwangudlwangu lobu eNyatsime ngeSonto lapho ukhansila wendawo ahambe khona emzini wakoAli lamanye amalunga ebandla elibusayo bachitha isililo lesi besithi abantu kumele bayebuthanela kwenye indawo.
Baqhubeke ngesiga lesi ngoMvulo batshaya amalunga omndeni kamufi njalo bathumba abangamatshumi amabili laba, abagoqela omama abatholakale kwelinye ipulazi betshayiwe balimala, kubike ibandla leCCC.
UAli yena uthunjwe kumaviki amabili eduleyo ngumsolwa obikwa elilunga leZanu PF, uMnu Pius Jamba, kwazotholakala isidumbu sakhe ebulewe wajikelwa emthonjeni oseduzane lomuzi kaJamba eNyatsimbe ngeSonto.
Igqwetha lemuli yakoAli uMnu Job Sikhala ubasolile abasekeli beZanu PF esithi benza ihlazo elikhulu.
Isikhulumeli samapholisa, uMnu Paul Nyathi, yena utshele iStudio 7 ukuthi abeCCC kumele bayemangama emapholiseni nxa kuyikuthi ngempela lwenzakele loludlakela. Isikhulumeli seZanu PF, uMnu Tafadzwa Mugwadi, ukhulume amazwi afanayo.
Umndeni wakoAli wona uthi umngcwabo awusoze wenziwe andubana kubotshwe ababulali bomntwanabo.
Ukubulawa kukaMoreblessing kanye lobudlova osobusenziwa esililweni sakhe sokusolwe kakhulu nguzulu ogoqela abalwela amalungelo labameli bamanye amazwe eZimbabwe abagoqela abeEuropean Union labeBhilithani.
Your browser doesn’t support HTML5
Udaba Siluphiwa nguMlondolozi Ndlovu