Umndeni welunga leCitizens Coalition for Change (CCC), uMnu. Langelihle Dube, uthi udabukile ngokubulawa kwakhe ngoLwesithathu emadabukakusa.
AbeCCC labo bathi kungaba lesandla semfene kuloludaba.
UDube ungenelwe ngamajaha amane endlini yakhe eLobengula West koBulawayo amgamula ngebhemba esithi afuna imali.
Aphinde ahlukuluze umkakhe labantwana asethatha amadola eMelika aphansi kwangamatshumi amabili lanhlanu, US$25, lomakhalekhukhwini abaleka. Umkakhe uNkosikazi Nobukhosi Dube uthi wethuswe yikubulwa kuka Dube.
Isikhulumeli samapholisa uAssistant Commissioner Paul Nyathi uthi basaphenya udaba lolu.
Kodwa udadewabo kamufi, uNkosazana Christina Dube, uthi abayithakazeleli indlela amapholisa aphethe ngayo loludaba.
Umakhelwane, uNkosikazi Slyvia Makota, uthi ukhala labomdeni esola njalo lebandla leCCC.
Ukhansila kaWard 14, uMnu. Phineas Ndlovu, uthe uDube ubengumuntu wabantu.
Lanxa abanye becabangela ukuthi lolu kungaba ludaba lobugebengu nje, abanye bathi kungaba lesandla semfene njengoba sokulungiselelwa ukhetho lomnyaka ozayo. Omunye wabalombono lo ngolwela amalungelo oluntu uNkosikazi Cora Ndebele.
AbeCitizens Coalition for Change labo bathi kungaba kukhona okutshaya amanzi kuloludaba. Nansi isikhulumeli salelibandla koBulawayo uMnu Swithern Chiroodza.
Kodwa ilunga leZANU-PF, uMnu. Believe Gaule, uthi abantu kumele bekele amapholisa aphenye ukuze kuphume iqiniso hatshi ukugijimele ukukhombana ngeminwe.
Ibandla leCCC lithi uDube uzangcwatshelwa emzini wakhe Esigodini, kuWard 5, eMlomolihoto ngoMgqibelo. Utshiye umkakhe, abantwana abahlanu labazukulu ababili.