Amapholisa kweleBotswana abulala ababili abeZimbabwe abacatshangelwa ukuthi kade bentshontsha.
Amapholisa kweleBotswana ngoMvulo adubule abulala ababili abeZimbabwe abacatshangelwa ukuthi kade bezama ukuntshontsha imali behlomile ngemibhobho.
Lokhu kuzangesikhathi amapholisa kweleBotswana ekhala ngokuthi izizalwane zeSouth Africa lezeZimbabwe zingena kulelozwe ukudala amacala behlomile.
Isikhulumeli samapholisa kweleBotswana, uMnu. Near Bagali uthi amapholisa kawasoke adonde ukukhalisa imibhobho enyameni kuzigebengu ezidala amacala zihlomile.
“Sizangqikilana labo singesabi. Asingeke sivumele isimo lapho abantu bethu sebehlalela evalweni. Abantu bethu kumele bakhululeke. Sifuna ukuthi lowo ofuna ukudala icala ehlomile, acabange kabili.”
Kusehlakalo sangoMvulo, uBagali uthi kade kulabane abeZimbabwe lababili abeBotswana kade bezama ukuntshontsha. Uthi ngaphandle kwababili abeZimbabwe ababuleweyo, ababili badutshuliwe, balimala kabuhlungu bahanjiswa esibhedlela.
Ababili abakweleBotswana labo babikwa basesibhedlela besesimeni esibi.
Ukubulawa kwababili laba kuza kungensukwana ommele usibalukhulu wamapholisa kweleBotswana, uMnu. Phemelo Ramakorwane ekhonone ukuthi bathwele nzima ngezigebengu ezingena zivela eSouth Africa leZimbabwe.
“Sibe lamacala amangalisayo. Uma sidingisisa sithole ukuthi abantwana bethu badala lawa macala bebambene labanye babo abeSouth Africa kanye labeZimbabwe,” kutsho uRamakorwane.
Owe Zimbabwe ohlala eGaborone uMnu. Mkhululi Moyo uthi mhlawumbe eleBotswana liyadeleleka ngabavela phandle kwelizwe abacabanga ukuthi bangazenzela umathanda.
“Ilizwe laseBotswana yilizwe elingathi lithule kakhulu entweni ezinengi abantu besebesuka becabanga ukuthi bangayenza abafuna ukukwenza, kanti ababuzanga elangeni. Bazalima ngoba lohumelende usekunanzelele kakhulu," kutsho uMoyo.
Kukanti esinye njalo isizalwane seZimbabwe uMnu. Gift Ncube uthi kumgceke ukuthi abavela phandle basebenzisana labeBotswana ukudala amacala.
Kunzima ukuthi kubonakale abantu bangaphandle kuyibo abadala amacala. Kodwa umuntu akasoke abuye engelalwazi, Kulokusebenzelana labangapha.
Umphathintambo wezamapholisa, uMnu. Kagiso Mmusi uthi amapholisa kumele angathandabuzi kodwa afake uhlamvu labo abadala amacala behlomile, ngenxa yokuqonga kwamacala la enyangeni ezimbalwa ezisanda kwedlula.
Your browser doesn’t support HTML5
Udaba Silethulelwa nguMqondisi Dube