Isikhwicamfundo lomlobi olodumo wengwalo zeSiNdebele, Isaac Mpofu, obhubhele koBulawayo ngoLwesihlanu, unconywa ngemisebenzi yakhe yokuthuthukisa ulimi losiko lwaMaNdebele ngenhlelo zakhe zokuloba ingwalo ezifundisayo.
Abantu abanengi, ikakhulu kwabezemfundo lamasiko esintu saMaNdebele, bahlulukelwe kakhulu ngokubhubha kuka Mpofu. Indodakazi yakhe yokucina, uNkosikazi Nokuthula Mpofu Gayidzanwa, ulandisa ngokubhubha kukayise.
"Ubesegule okweminyaka embalwa. Ubele zifo ekade zisaziwa kodwa ke ubaba ubengumuntu oqinileyo. Imnyaka yonke leyo ubekunqoba, ubele a gene esibhedlela kodwa aphume. Okwamanje kukhanya kumqinisile. Silosizi, okuyikho kakhulukhulu okwenze ukuthi ukhulu asitshiye yikuthi ubele Renal Failure."
Uyaphambili uMaMpofu egcizelela ngemisebenzi emihle kayise ayenzela uzulu.
"Ubaba ubengumuntu othuthukuse ilizwe engasomuntu okupolitics. Ubekhona ku Education kakhulukhulu. Ubambe isizwe efundisa abantu waze waya phutsha eqeda eretire ubese ngu Deputy Secretary we Education. Ubaba ubengumlobi ubebhala amabhuku akade esetshenziswa lezikolo."
Umuyi usebenze kakhulu engumbalisi njalo engumphathi wezikolo ezitshiyeneyo eZimbabwe kanye lokuloba ingwalo. UMnu. Bornface Ndimande, owasebenza kugatsha lukahulumende lwezokulima laye engunobhala, yikho aqala ukwazana lomuyi uMpofu. Uncoma kakhulu okwenziwa nguMpofu.
"Wake waba yiDeputy Secretary we Education. Sasihlangane emhlanganweni yamaCommitees Yama secretary lama Deputy secretaries and so on. UMpofu ngu teacher omdala ufundise abantu abanengi akulamuntu ongamaziyo njalo waziwa njengomuntu obengu mlobi njalo lamasiko ewazi kakhulu echasisa izinto ezinengi,ikholwa eliqinileyo le Brethren njalo ubengumuntu othanda ukuhlabela ehlabela kuhle emakhwayeni esaqinile. Ngithemba ukuthi kuzaba khona omunye ozathandukuloba ozathanda njalo isintu esiqondane laye, asilobe ngendlela UMpofu asilobe ngayo."
Ngaphandle kokufundisa amasiko lokuloba ingwalo, UMpofu wayengumculi omkhulu njalo emazi uNkulunkulu okwenza wathandwa ngabantu abanengi. Omunye obonga uMpofu ngokumfundisa ukucula ecaweni nguMnu. Sam Sibanda.
"Ngingathi ngimaze kakhulu ngo1977 ngigudlane laye ngale so skhathi. Kube kuhle ngoba ngazane laye ekuhlabeleni, mina bengithanda ukuhlabelela ngaqondana laye nguye owayeyi Choir master yethu e Brethren Christ. Izinto ezesintu ezinengi isintu kwakuphilwa kanjani izinto zazihamba kanjani ijaha nxa ngalikhula kufanele liphatheke kanjani yizinto abezazi kakhulu. Silahlekelwe kakhulu kulokhu."
UMpofu watshiywa ngunkosikazi wakhe emnyakeni emine eyadlulayo. USemlandele njalo ubhubhe ekhala ngomntanakhe ongumfana, uNkanyiso, owayehlala kweleMelika, okuthiwa wacina ukukhuluma laye emnyakeni elitshumi lantathu - 13 edluleyo njalo akwaziwa ukuthi ungaphi. UMnu. Stanley Mpofu ngumfowabo kamuyi. Udabuke kakhulu ngokutshona kuka Mpofu.
"Silahlekelwe kakhulu. Lo ndoda yikuthi asazi ukuthi kumbe ebantwaneni yikuthi umntanakhe uNkanyiso ngumuntu osele 13 years wacutsha ese United States of America asimazi ukuthi wayanga waphonguhamba nje,wayefundisa eNew York City waphongu nyamalala ebalisa I English khona ngale asimazi ukuthi ungaphi ngoba nguye umuntu esasicabangela ukuthi uzafuza yena. Kusele amankazana uNtokozo loNokuthula."
UMpofu utshiyele uzulu isipho solwazi ngengwalo zakhe ezigoqela ezithi Wangithembisa Lami, Akusoka Lingelasici, lelitsha elithi Sithini IsiNdebele. Ubeseloba elinye wasedlula engakalethuleli uzulu. Ukhangelelwe ukubekwa eceleni kwenkosikazi yakhe epulazii lakhe elincane eWarringham, esiqintini seMzingwane ngoLwesithathu.