Eyinye inhlanganiso ecubungula ezokhetho eyeElection Resource Centre (ERC) ithi kuqakathekile ukuba iZimbabwe Electoral Commission (ZEC) ikhiphe ugwalo lwamabizo abantu abazavota ngokuphangisa ukhetho lungakenziwa ukuze lokho okuyabe kungamanga kuhle kulungiswe masinya.
Esipha umbono walokhu okuphume kugwalo lwabantu abavunyelwa ukuvota kwele Zimbabwe ngemva kokhetho luka 2018 lolwama by-elections ka2022, umqondisi wenhlanganiso yeERC, uNkossazana Barbra Bhebhe, uthe iZEC kumele ikhiphe ugwalo lwabavotayo ngokuphangisa.
Uthe iZEC isiqala ukubeka imingcele yezigaba ezizasetshenziswa ngomnyaka ka2023 kukhetho olulandelayo.
UMaBhebhe uthe kumele iZEC ikhiphe ugwalo lwabantu abavotayo phansi kohlelo lolu.
UNkosazana Bhebhe uthe nxa lokhu kungenziwa kuzakupha iZEC ithuba lokulungisisa izikhalazo zamabandla ezombusazwe ukhetho lungakenziwa, okuzenza bamukele impumela yokhetho.
Uphinde wathi sebelobele iZEC becela ukuba baphiwe ivoters’ roll kungakaqali uhlelo lwe-delimitation..
Ugcizelele esithi iZEC kayibanikezanga ugwalo lwe-voters’ roll olwasetshenziswa kuma by-elections esithi basebenziswa ugwalo olwaphiwa abantu abangena kukhetho lolu.
Ukucubungala abakwenzayo kwatshengisa ukuba ugwalo lolu ngomnyaka ka2018 langomnyaka ke2022 alumanga kahle.
Abantu abafika phose inkulungwane ezilikhulu – 98,440 abavota ngomnyaka ka2018, bakhitshwa kugwalo lolu ngomnyaka ka2022.
Kuthi abantu abangafika amakhulu enkulungwane 10,000 bakhutshwa kundawo ababevotela kuzo kugwalo luka2022.
Indawo zokuvotela ezingamatshumi ayisithupha - 60 ezazikugwalo luka 2018 zakhitshwa kukhetho lwama by elections.
Lokhu kwenzakala kakhulu endaweni ezithi eNkulumane ko Bulawayo, eLuvuve lase Glenview South.
UMaBhebhe uthe lokhu lokunye kulakho ukuphazamisa ukhetho.
Ingcwethi kwezombusazwe ezimeleyo, uMnu. Pride Mkono, uvumelane leERC esithi iZEC kumele ilungise lokhu ukuze ithembakale.
Asenelisanga ukuthola umbono weZEC ngoba isikhulumeli senhlanganiso leyi, uMnu. Jasper Mangwana, ubengaphenduli umakhalekhukhwini.
EleZimbabwe likhangelele ukwenza ukhetho lwabameli bephalamende, amakhansili lo mongameli ngomnyaka ozayo.