Izizalwane zakwele South Africa eziyisikhombisa ebezivalelwe zisetheswa icala lokubulala isizalwane seZimbabwe uElvis Nyathi elokitshini leDiepsloot eJohannesburg ngenyanga ephelileyo, zikhululwe ngebail lamhanje ukuze leli cala lithethwe ziphandle kwentolongo.
Esethula isinqumo sakhe emthethwandaba kaMantshi eRandburg eJohannesburg phezu kwesicelo sebail sabesilisa abayisikhombsa laba, umantshi uNkosikazi Hleziphi Mkhasibe, uthe abukho ubufakazi obuqinileyo obunikezwe ngabatshutshisi lamapholisa obungenza kube yingozi ukuthi abesilisa laba bakhululwe ngebail.
UNkosikazi Mkhasibe uthe isinqumo sakhe bekufanele asethule ngoLwesine kodwa umeli wabamangalelwa waseveza ukuthi umfakazi obethe abahlanu babamangalelwa wababona bebulala uNyathi, ubuye wazobesula lobu bufakazi wathi yena ubebaqamba njengabantu abaziyo hatshi abantu ababulala uNyathi.
Uthe amapholisa ehlulekile ukuchaza ukuthi yiphi indima eyadlalwa ngumuntu ngamunye ekubulaweni kukaNyathi ngaphandlenje kokuthi babeyingxenye yalabo abakhanda umuyi bamtshisa waze wafa.
Uthe kuyacaca njalo ukuthi akekho phakathi kwabayisikhombisa laba owabanjwa esenza leli cala njengoba bonke babotshwa sekulensuku uNyathi ebulewe.
Ukukhululwa kwabo lokhu ngebail kulethe intokozo enkulu kumuli yabesilisa laba layo ebisemthethwandaba. Kodwake umzala kaNyathi, uMnu. Mphathisi Ndlovu, laye obesemthethwandaba uthe njengemuli badaniswe kakhulu yisinqumo somthethwandaba.
"Besibhekele ukuthi umantshi uzaqinisa isandla kakhulu ekucwaningeni ngale indaba. But anyway akunanto esingayenza. Sicabanga ukuthi bayakwazi abakwenzayo. Mhlawumbe uthole ukuthi babakhiphile ngebail kodwa ngoba icala lisazoqhubeka lithethwa sisalethemba lokuth isigwebo bazasithola."
Isikhulumei seviyo labatshutshisi unkosikazi Phindi Mjonondwana utshele iStudio 7 ukuthi lobanje bekhululwe ngebail abesilisa laba balethemba lokuthi kusaselecala elikhulu ababhekane lalo.
"Singumnyango wokushushisa siyamukela isinqumo senkantolo. Sizoqhubeka nophenyo. Kuzothi uphenyo ma seluqediwe beseke sizilungiselela ukuthi icala lizothethwa enkantolo.
Umantshi ulaye omangalelwa ukuthi bahlawule amarandi azinkulungwane ezintathu (R3000) yebail umuntu ngamunye, bangathintani labafakazi kuloludaba, njalo baphenduke njalo emthethwandaba mhlaka 7 Ntulikazi.
Abatshutshisi bake bazama ukuthi unkosikazi kamuyi, uNkosazana Nomusa Tshuma, yena osesekhaya eZimbabwe aphenduke kwele South Africa ezokutsho ukuthi kambe kukhona yini kwababotshiweyo owambonayo elalabo ababulala umkakhe, kodwake yena wala esithi wesabela impilo yakhe.
Omunye wabeZimbabwe owahlukunyezwa ndawonye loNyathi yena kenelisanga ukutsho ukuthi kwababotshiweyo ukhona yini oyingxenye yalabo abahamba loNyathi bayambulala.
Selokhu kuqale lonyaka kuyanda ukuhlukunyezwa kwezizalwane zakwamanye amazwe kwele South Africa ezithi abokuza abaphume baphele ngoba babathathela imisebenzi kanye lokudala amacala.
SEE ALSO:
Udaba Esilethulelwe NguThuso Khumalo