Usebotshiwe uMnu. Sybeth Musengezi, owaphanyeka udaba emthethwandaba esithi uMongameli Emmerson Mnangagwa kakhethwanga ngemfanelo ngomnyaka ka2017 kususwa esikhundleni kowayengumongameli, uRobert Mugabe, libutho.
UMnu. Nqobani Sithole, igqwetha elimele uMusengezi, uthi ujaha lo ubotshwe izolo esanda kwetheswa amacala okunikwa ikhadi eliveza ukuba ulilunga leZanu PF okungekho emthethweni. USithole uthi uMusengezi, obotshwe ngamapholisa eHarare kulandela ukuzihambisa kwakhe eHarare Central Police Station, kuthiwa wasebenzisa ikheli elingaqondakaliyo ngesikhathi esiba lilunga leZanu PF.
Amapholisa athi uMusengezi wakhethwa ukuba ngomunye wenkokheli yebandla leli ngakho-ke wakhethwa okungekho emthethweni wathola inzuzo etshiyeneyo yokuba lilunga lebandla elibusayo.
UMusengezi, othi uMnangagwa wangena esikhundleni sikanobhala jikelele webandla leZanu PF ngendlela engaqondanga ngesikhathi owayengumongameli uRobert Mugabe esuswa esikhundleni, uyakuphika lokhu.
Uthi uhlangothi lweCentral Committee olathatha isinqumo sokuthi uMnangagwa athathe isikhundla sika Mugabe lwephula isisekelo sebandla leli.
UMnu. Chris Mutsvangwa, isikhulumeli sebandle leZanu PF, walile ukukhuluma ngodaba lolu esithi kumele umsakazo weStudio 7 ukhulume lamapholisa.
Asenelisanga ukukhuluma lesikhulumeli samapholisa, uSenior Assistant Commissioner Paul Nyathi, obengaphenduli umakhalekhukhwini.
SEE ALSO:
Ingxoxo Esiyenze LoMnu. Nqobani Sithole