WASHINGTON DC - Uzulu seveze ukuthukuthela phezu kokufa kwabantu abane engozini yekhombi ebhewuke ngemva kokupontshiswa ngamapholisa ngensimbi ezihlabayo, ama-spikes, eMutare izolo.
Lumkhuba usudale ingozi ezifanayo esikhathini esedluleyo.
Isikhulumeli samapholisa uMnu Paul Nyathi uthi ikhombi le idlule ku-roadblock igijima emgwaqweni weVumba-Mutare yasibhewuka kwafa abantu laba njalo kwalimala abayisitshiyangalombili.
Kodwa katshongo lutho ngokuthi amapholisa yiwo abangele lingozi ngokupontshisa.
Inkundla yeZimlive ithi abantu ekade bekulikhombi bagoqela abantwana besikolo.
Isehlakalo lesi siza ngesikhathi amapholisa ehlasela abezimota ezithwala uzulu ezisebenza zingekho phansi kweZupco, khona osokubangele ukusilela kwezimota ezithwala abantu elizweni.
Inengi emadolobheni afana leHarare lakoBulawayo selisiya emsebenzini ngenyawo.
Olwela amalungelo oluntu njalo eyingcwethi kwezombusazwe uMnu Effie Dlela Ncube utshele iStudio 7 ukuthi okwenziwa ngamapholisa lokhu yikwephula amalungelo oluntu okusegcekeni okungamelanga kuvunyelwe.
Your browser doesn’t support HTML5
Ingxoxo loMnu Effie Dlela Ncube
Isikhulumeli sikahulumende uMnu Nick Mangwana, eloba enkundleni yeTwitter, uthe uhulumende uyalwazi udubo lokusilela kwezimota ezithwala njalo uthe uphezu kwalo loludaba.