Lanxa izulu liqhubekela phambili lisina kwele Zimbabwe, izakhamizi zesiqintini seMangwe esabelweni seMatabeleland South sezibhekane lodubo olukhulu lokuswela ukudla ngenxa yokungatholanga isivuno esihle lonyaka.
Abalimi endaweni le bahlanyela amabele atshiyeneyo kwatsha emasimini ngenxa yesikhudumezi esike saba khona. Inengi seliphila ngokudla kokuphiwa okuholiswa zinhlanganiso eziphathisa abaswelayo.
Izakhamizi zalumhlubulo zalima izulu lingakani ngaphansi kohlelo lwegatshompo, olukhuthazwa zingcwethi kwezokulima. Akusebenzanga konke lokhu ngoba layalela emoyeni izulu, kwatsha qhu emasimini.
Abalimi abanengi bathi sebebhekane lendlala eyesabekayo eMangwe esabelweni seMatabeleland South loba izulu lisina okwamanje. (Umfanekiso: Ezra Tshisa Sibanda)
UMnu. Nduna John Ndlovu, ohlala eManyele, uthi iyesabeka indlala yalonyaka.
"Idrought elapha bakithi buyani libone ukuthi esinakho la kunjani, kulokufa esinakho la, kodwa unkulunkulu ukhona. Lina ncedisani ngapha kulezikolo kodwa emasimini kakulalutho vele. Uyabona amasimi ethu anjani ukufa ubusika futhi siyafa ngingazi ukuthi ezikolweni ukuthi abantwana kulamasports bayakudlani, basinceda kakhulu UUSAID, iUSAID sileminyaka ngumama wethu, nguye ubaba wethu ngukhulu wethu uUSAID. So nxa isiphuma inika eyinye ibranch, buya branch ye USAID umbone lami ukuthi ngiyahlupheka.
Esigabeni seBrunaberg indlala ingene yayafika emsamo. UMnu Phawulina Sisinga Dube uthi isimo sibi ngempela.
"Izulu laline kahle but uyabona abaqala ukulima batholile mbijana ngoba liphele elokuvuthisa izilimo sokuseduze ukuvuna, uyazi ukukhitshwa ukudla emlonyeni, asazi izifuyo kodwa ngoba liyana ke kungcono ngoba owokunatha wona sizawathola.”
Amazwi akhe agcizelelwa nguMnu. Samson Maduda, ohlala eBrunaberg, othi ngabe uhulumende uyangenela abancede.
"Ekhaya thina silendlala enengi kakhulu, indlala engiyitshoyo sicabanga ukuthi utshani busebukhulu khathesi kodwa ngokuya kwesikhathi buzaphela khathesi ngesimo sokuthi abuvuthwangwa. Then into ezinengi besicela ukuthi uGovernment engasincedisa, ugovernment ukusincedisa kwakhe engxenye alethe ukudla ngoba asitholanga lutho emasimini"
UHerdman Edmund Tshuma, umlisa wakoNgwanyana, uthi uhlelo lukagatshopo lonyaka aluzange lubancede ngitsho lakancane.
"Izulu linile ukuqala, salima sibili kwabakuhle ngabo December January kuthe ngo February izulu lahamba lahamba. Lahamba kwatsha everything, okunjengomumbu abantu babewulime kakhulu ngenxa yokuthi besilandela iprotocol kahulumende ethi silime ugatshopo. So sasesiyandisa umumbu kugatshopo kwathi unyawuthi lo owawusele ulinyiwe umlutshwane hayi inyoni zathi sikhona.”
Uhlangothi lwenhlanganiso yomanyano wamazwe womhlaba olubona ngoncedo lokudla, olwe United Nations World Food Program lukhiphe umbiko othi eleZimbabwe likhangelelwe ukuba lendlala enkulu lonyaka kubangelwa yikuswelakala kokudla lesimo esibi somnotho welizwe, ukukuphuka kwentengo yokudla kunye lesivuno esibi kulandela ukungani kuhle kwezulu. Lokhu kubikwa kuzatshiya inengi labantu lilamba njalo kuzaphileka nzima.
UMongameli Emmerson Mnangagwa emazwini akhe ngelanga likazibuse uthe uhulumende akasoze ayekele abantu bebulawa yindlala njalo uthembise uzulu wonke oswelayo ukuthi uzaphiwa ukudla.
Emangweni waseMangwe ukudla okwakugciniwe ngabalimi sokuphelile, Umangoye ubikwa eselala eziko.
SEE ALSO:
ZIkhala Ngendlala Izakhamizi eMangwe