Izizalwane zakwele South Africa zithi sokumele abokuza abangalamaphepha aqondileyo okuhlala kulelolizwe baphume bephele ngoba umkhankaso weOperation Dudula uqhubekela phambili ezabelweni ezitshiyeneyo.
Abadabuka eZimbabwe abahlala kulelolizwe bathi bayakunanzelela ukuba abasafunakali kwele South Africa. Abafisa ukuba abadabuka eZimbabwe bebuyele ekhaya bagoqela uMnu. Simthembile David Mposwa.
UMposwa uthi inhlanganiso ekhokhelwa nguMnu. Nhlanhla Lux Dlamini esola okwenziwa ngabokuza izakwenza izimanga kwele South Africa.
UMnu. Sifiso Khumalo, Omunye njalo osola okwenziwa ngabantu bokuza, uthi kuzwisa usizi okwehlela odabuka eZimbabwe uElvis Nyathi eDiepsloot, lobanje kukhanya engani kabulawanga ngabakumkhankaso weOperation Dudula. UKhumalo uthi sesifikile isikhathi sokuthi abokuza bebuyela abadabuka khona.
Kodwa uMnu. Oscar Bhekumuzi, odabuka eZimbabwe ohlala kwele South Africa,uthi ubugebengu abukhetho mhlobo.
UMnu. Mbuso Mhlanga, olamaphepha aqondileyo okusebenza kwele South Africa, uthi kusobala ukuba sebezodwa yizizalwane zakwele South Africa.
UMhlanga uthi izizalwane zakwele Zimbabwe sebedudulwa lakwamanye amazwe. Uthi uDlamini kusobala ukuba usekelwa yiziphathamandla zikahulumende.
Lokhu kusekelwa nguMnu. Nhlanhla Nzuza Mahlangu, odabuka eZimbabwe ohlala kwele South Africa.
Kuyaxokozela kwele South Africa kulandela ukubulawa kuka Elvis Nyathi yizizalwane zakwele South Africa ezazidinga izigebengu.
UNyathi, owayehlala eDiepsloot njalo ongcwatshwe eZimbabwe ngeviki ephelileyo, wayezisebenzela ezindlini zabantu kwele South Africa. Okwamanje uqhubekela phambili umkhankaso weOperation Dudula kulelolizwe.
SEE ALSO:
Zitshaya Phansi Ngenduku Izizalwane Zakwele South Africa Ezithi Abantu Bokuza Ababuele Emazweni Abo