Ukungahlaliseki kwentengo yempahla lemisebenzi etshiyeneyo eZimbabwe kuyaqhubeka ngesiqhubu esethusayo, ingcwethi ezicubungula ezomnotho zisithi okunye okubangela lesi simo, yimpi ephakathi kwele Russia le Ukraine esidale ukuthi intengo yempahla ikhuphuke emikambo yemhlabeni wonke jikelele.
Isilinganiso sokukhuphuka kwentengo yempahla ekupheleni kukaMbimbitho besimi kumatshumi ayisikhombisa lambili ekhulwini (72,70%).
Idola elilodwa eleMelika lilingana lamadola eZimbabwe angamakhulu amathathu lengxenye emkambo omnyama (USD1:ZWL $350), kodwa isilinganiso sikahulumende sisithi idola elilodwa eleMelika lingamadola akweleZimbabwe alikhulu lengxenye (USD$1:ZWL $150).
Ngeviki ephelileyo inkampani kamakhalekhukhwini eye Econet Wireless iqale ukuthengisa i “airtime” ngedola leMelika, okutshengisela ukuba isisindo semali yeZimbabwe siyehla nxa iqathaniswa leyaphandle.
Umnunzana Effort Ncube umqondisi weNational Consumer Rights Association uthi abathengi abavikelekanga ekukhuphukeni kwentengo ngaphandle kokuba kulungiswe umnotho welizwe.
“Indlela yokuvikela abathengi ekukhweleni kwezinto yikuthi kuqiniswe umkhonomi. Kungenziwa lokhu abantu bazenelisa ukuba lemali, lemisebenzi kanye lamabhizimusi aqinileyo.Kuzenza ukuba impahla esizithengisela ngaphandle zibe zinengi okwedlula lokhu esikuthenga ngaphandle. Lokhu kuzaqinisa imali yeZimbabwe iqine, kodwa ke ukuqina komkhonomi kudinga ukuthi kulungiswe ipolitika kuqala.”
Ngeviki edlulileyo uhulumende wengeze iholo labakubutho kuphela ngesilinganiso sokungamatshumi phose amane ekhulwini-37%, esithi lokhu kungenxa yokukhuphuka kwentengo yempahla ikakhulu ukudla elizweni.
Umnumzana Qhubekani Nkala ongumongi uthi zonke izisebenzi zikahulumende zihlaselwe yikungahlaliseki kwentengo ngakhoke uhulumende kumele engeze iholo lezisebenzi zakhe zonke.
"Lapha kulobunzima, asazi ukuba kungabi sekulenkethabetshebi engaka. Abanye abantu sebekhanya beqakathekile labanye. Kodwa ke indlala isitshaya sonke, zonke izisebenzi ziyayizwa i inflation ekhona. Aluba uhulumende uyakhangela wonke amahlanhla akhe ancedise bonke abantu, angezelele bonke ngokufanayo ukuze izisebenzi zisebenze zijabulile.”
Umnumzana Thabo Ndlovu igcwethi kwezomnotho uthi ukwehlisa intengo yamafutha ezimota kungadala ukungakhuphuki kwentengo yempahla.
“Okukhulu i-government engakwenza yiku subsidizer ifuel. As long as i fuel yethu idula yiyo eyi contributing factor enkulu ekukhweleni kwama prices. Uzathola ukuthi eSA ifuel yakhwela between 1-2% kodwa kithi yakhwela nge 10% lalobasithenga ku same supplier. I government kumele i adjuster ama taxes, ngoba aku percentage basis okwenza ukuthi I order price ye fuel ingakhwela kuba lama effects on i price yama taxes ngoba layo iyakhwela at a percentage ndawonye le price.”
Inhlanganiso encedisa ukuthuthukisa umnotho emazwe womhlaba eye International Monetary Fund ixwayisa eleZimbabwe ukuba isikwelede sayo silakho ukukhuphuka ngenxa yokwehluleka ukuhlawula abalimi abamhlophe abathathelwa umhlabathi.
Umnumzana Ambrose Sibindi ugcinisihlalo wenhlanganiso yezakhamizi eye Bulawayo Progressive Residents Association (BPRA) ukhuluma ngesikwelede selizwe leZimbabwe.
“Njengabantu beZimbabwe, isikwelede lesi sizenza ukuthi kungabi le Investment, kungabi labantu ababuya ukuzovula amankampani kithi. Itrading ephakathi keZimbabwe lamanye amazwe ingabi nhle. Khathesi siphila ku global village kufanele singenelane, ukuze sithuthukise umnotho welizwe. Kufanele uhulumende abone ukuthi uyakulungisisa. Nxa engasakwenzanga abantu uyibona asebezathwala nzima.”
Ngeviki edluleyo umphathintambo wezemali kuhulumende, umnumzana Mthuli Ncube ekhuluma eseHarare emhlanganweni wabosomabhizimusi uchaze ukuba sekufakiwe indlela ezokubhalada izikwelede zangaphandle besekelwa libhanga lomhlaba wonke jikelele. Ethi njalo lokhu sekuthuthukise ubudlelwano beZimbabwe lenhlanganiso eziphathisa ngemali ezaphetsheya.
AbeInternational Monetary Fund kunyanga edlulileyo ekaMbimbitho bathe bayananzelela ukuba iZimbabwe iphakathi kwezikwelede kodwa iyamukela ukuzimisela kwelizwe leli ekubhadaleni izikwelede. Ekuqaleni komnyaka ka2022 uNcube ubike ukuba isikwelede seZimbabwe siphosa sibe ngamabhiliyoni alitshumi lane (USD$13,7 billion).
Embikweni owethule nguMongameli Emmerson Mnangagwa izolo kuthakazelelwa uzibuse uchaze ukuba ngomnyaka ophelileyo umnotho welizwe uthuthuke ngesilinganiso esiphezu kwesikhombisa ekhulwini (7,4%), kuthi lonyaka kakhangelwe ukuthi uthuthuke phose ngesithupha ekhulwini (5,5%).