Abantu abahlala koBulawayo bananza ikhefu lePhasika besezindlini zokukhonza uNkulunkulu ngesikhathi seliphansi inani labatholakala belegciwane leCOVID-19.
Ayathokoza amakholwa lonyaka ngoba enelise ukubuthana ezindlini zokukhonza uNkulunkulu. Besekulaminyaka emibili besehluleka ukubuthana ngekhefu lePhasika ngenxa yokumemetheka kwegciwane leCOVID-19.
UMfundisi Kelvin Mpofu, owebandla leChurch of Christ, ngomunye wabathokozela ukuba benelisile ukubuthana lonyaka.
Elinye njalo ikholwa, uNkosikazi Prisca Dube, uthi balithakazelele kahle ikhefu lePhasika loba umnotho umanikiniki eZimbabwe.
UNkosazana Tanaka Murerwa, okhonza eRoman Catholic Church, uthi balithakazelele ilanga lephasika kodwa hatshi njengemvama.
Kunengi okwenziwa nguzulu ngekhefu lePhansika. UMnu. Samson Moyo uthi ikhefu leli lonyaka belingelamali, amabhizimusi ebephansi lemitshado ibimbalwa.
UNkosinazi Nokuthaba Mbuyazwe uthi ikhefu lephasika ulidlale esenkonzweni. Uthi amasela amthwalise amagabha avuzayo.
Amakholwa amanengi emhlabeni wonke jikelele ananza ikhefu lePhasika ngendlela ezitshiyeneyo. Kusenjalo, uhlangothi lwezempilakahle luthi akulamuntu obulewe ngumkhuhlane weCOVID-19 izolo eZimbabwe.
Abahlolwe batholakala belomkhuhlane lo bangamatshumi amabili lane – 24. Umkhuhlane weCOVID-19 sowabulala abantu abafika phose inkulungwane ezinhlanu lengxenye - 5,462 eZimbabwe.
SEE ALSO:
Udaba Esilethulewe NguAnnahstacia Ndlobu