Inengi labeZimbabwe abahlala kwele Botswana bakhangelelwe ukuphuma kusukela lamuhla, belubhekise ekhaya ukuyadlala ikhefu lephasika lezihlobo labangane.
Lokhu kuza ngesikhathi amazwe amanengi eseyekethise iziqondiso seCovid-19, ikakhulu ukuvumela labo abahlatshwe ijekiseni ngokupheleleyo, ukuthi bachaphe umngcele kungela sidingo sokuthi bahlolwe icoronavirus.
Ihofisi yommeli weZimbabwe kwele Botswana ithi kulenani eliphezulu labamabhasi elifake izecelo zokuchapha zisiya eZimbabwe ngekhefu lephasika.
Ngendlela yokulandela iziqondiso zeCovid-19, iZimbabwe yafaka umthetho wokuthi amabhasi kumele aqale acele imvumo ehofisini yommeli weZimbabwe eseGaborone.
Inani lamabhasi ahamba phakathi kweZimbabwe leBotswana kade selehlile ngesikhathi inengi lingazimiselanga ukuhamba ngenxa yemigoqo ebidalwa yiziqondiso zokuvimba ukumemetheka kweCovid-19.
Kodwa kukhanya sekulenguquko kulesi simo ngoba inengi selingena indlela ngesikhathi sephasika.
Lokhu kulandela ukuyekethiswa kweziqondiso zeCovid-19 ngamazwe atshiyeneyo emhlubulweni wezansi yezwekazi leAfrica, agoqela eleBotswana, South Africa kanye le Zimbabwe.
UMnu. Fortune Phakathi, olebhizimusi yokuthwala imphahla, uthi abantu bayaphathisa ngobunengi, noma nje kungakakhanyi ukuthi abanye bazahamba.
“Ngiyaqala ukuhamba lokhe kutshitshwe isidingo sama PCR, ngizabona isimo ngingafika emngceleni. Kodwa abantu bayaphathisa, inking nje kulapho uma imota yakho ingafiki endaweni zabo. Umnyaka usaqala abanengi kade bethumele kakhulu ngekhisimusi, ngakho basazama ukuthi basebenze. Ikhefu lephasika ngeke lafana lekhefu lekhisimusi.”
Osendleleni elubhekise koBulawayo esuka eGaborone, umnunzana Amos Ndlovu uthi noma nje bekungakabi labantu abanengi emgwaqweni, kuyaphithizela kulamanye amakhefu asanda kudlula ngesikhathi seCovid.
“Kukhanya kuyanyakazela abantu besendleleni. Ukukhipha ama restrictions awe PCR test kulabo abahlatshiweyo kungaba yisizatho abantu abanengi bengena indlela.”
Lo ngumbono kaNkosikazi Emily Dube othi khathesi intengo yokuhamba isiyehlile ngemva kokuthi kususwe umgoqo wokuhlolwa iCovid-19 kulabo abahlatshwe ijekiseni ngokupheleleyo.
“Sekuzabulula ukuhamba ekhaya, ngenxa yokukhitshwa kwama PCR test. Bekuvele kunzima ukuhamba abantu becabanga kabili, kodwa khathesi sizahamba sichelesile.”
Ngenxa yesimo seCovid esiqhubeka sisiba lobubelo eleBotswana selivule umngcele weMatsiloje ongakhatshana lowePlumtree. Lokhu kukhangelelwe ukwehlisa ukuphithizela emngceleni wePlumtree leRamokgwebana ngesikhathi sekhefu lephasika.