Kuliviki kuhlelo Woza Friday silomculi odume okwamagama ngengoma zeJazz, uThandy Dlana, ocula ekoBulawayo.
UThandy uthi qoki qoki baleli, kahle alikhumbuze kancane ngembali yakhe.
Zimbabwean jazz artiste Thandy Dlana
"Ngingumculi ozalelwe koBulawayo, ohlala koBulawayo, oqale ukucula ngo2014, ecula umculo engiwubiza ngisithi EthnoSoul, elefusion yeJazz. Umculo ojulisa ingqondo, owenza lawe uzizwe kusithi hlala ulalele.”
Abantu abanengi bawujayele umculo kaThandy njalo bamqhasha abaculele kuzindawo ezitshiyeneyo. Ngesikhathi seCovid, uThandy ucindezele idlalade lakhe elitsha. Liyahlakaza.
"Ngomnyaka ka2014 ngikhiphe iEP yami okuthiwa ‘Ongaziwayo’ elengoma ezine ngasengizokhipha njalo idlalade elilengoma ezilitshumi okuthiwa 'lnganekwane’ ngomnyaka ka2020. Mina uThandy Dlana ngingumculi ngiphinde ngibe ngumlobi wezingoma. Okutsho ukuthi ingoma zami zonke engiziculayo ngiyazibhalela."
Jazz artiste Thandy Dlana
Usebenza labaculi abanengi bejabulisa uzulu eZimbabwe. UThandy uthi yibo abamenza abelomfutho wokuyaphambili ngomculo.
"Abaculi abangi khuthazayo yilabana esihlala sonke sikhule sonke sincedisane ngemibono, siqinisane, abaculi abangancindezeliyo, so abaculi abangi khuthazayo ngabantu esibona ngaso linye, abantu abafuna ukubona umculo usiya phambili, abantu abaqakezela abanye."
UThandy ehlangene lenye intombazana edume kakhulo ngomculo wesintu, uNkwali, bakhokhela iqembu labaculi abatshiyeneyo koBulawayo okuthiwa yiSongs of Lozikeyi.
Leli qembu licula lihaya iNdlovukazi uLozikeyi owayeylikhosikazi leNkosi Lobhengula, owasala ekhokhela ibutho inkosi isinyamalele.
Jazz artiste Thandy Dlana
Uhulumende weZimbabwe wanxusa iSongs of Lozikeyi ukuthi iyecula eDubai kuWorld Expo lapho uThandy labanye bakhe abenze izimanga batshiya abantu bekhalela umphehlo.
Lona liminjani leliqembu? "So using of Lozikeyi ulami uThandy Dlana usisi uNkwali uNomathamsanqa ku-main vocalists, ababhali bezingoma. Sitholakala kuFacebook @thandy dlana 1, ngikhona njalo ku-Instagram Thandy_dlana , ngiphinde ngibekhona lakuTwitter @girlthandy. Umculo wami uyatholakala kuwo wonke amadigital platforms.”
Besikwejise loThandy Dlana kuhlelo Woza Friday. Kadlali, uyasebenza uthi udla umculo, alale umculo. Ufisa ukuba ngumhlabeleli odume iAfrica yonke.