Akula imidlalo elula kusigaba se Castle Lager Premier Soccer League, kutsho uJoey Antipas, umqeqetshi weqembu elihlezi phezu kwengalane yemiklomelo ele Chicken Inn.
UAntipas ubekhuluma ngemva komdlalo weqembu lakhe lele Manica Diamonds wona ophele zingutshiki lobhanqa 3 ka 3 ngoMgqibelo.
“Akusiwo mncintiswano olula njalo akulamidlalo elula ngoba amaqembu wonke adlala ngokuzimisela okukhulu.
Kuqakathekile ke ukuhlonipha labo odlala labo njalo ube lomqondo omuhle ngoba nxa ungenzanga njalo uqala ukudelela ubone angani usunqobile loba ibhola lingakadlalwa.
Kumele kusentshenzwe gadalala ukuze iqembu linqobe,” kutsho uAntipas.
Iqembu le Chicken Inn lilemiklomelo engamatshumi amabili lantathu ngemva kwemidlalo elitshumi njalo litshiya lelo elisendaweni yesibili ele Dynamos ngomklomelo owodwa.
Iqembu leDeMbare linqobe iqembu le Black Rhinos nge 2 ka 1 ngeSonto njalo selinqobe kumidlalo yalo emihlanu eyedluleyo.
Endaweni yesithathu kuleqembu le Triangle lona elibe ngutshiki lobhanqa 0 ka 0 lele Highlanders ngeSonto njalo lilemiklomelo engamatshumi amabili.
Iqembu le Manica Diamonds lisendaweni yesine ngemva kokuba ngutshiki lobhanqa lele Chicken Inn njalo lilemiklomelo elitshumi lathoba munwe munye.
Umqeqetshi walo uJohannes Nhumwa uthi iqembu lakhe litshengisele ukuba liqinile kakhulu.
“Indlela esenelise ngayo ukuguqula isimo somdlalo ibinhle kakhulu njalo ukwenelisa ukuphenduka sicine kuyithi esesikhokhela kutshengisa ukuba iqembu lethu liqinile ngoba phela besidlala leqembu elihlezi phezu kwengalane yemiklomelo,” kutsho uNhumwa.
Emdlalweni wakhe wakuqala emgumqeqetshi weqembu le Ngezi Platinum Stars, owayengukaputeni weqembu lama Warriors uBenjani Mwaruwari uthole umklomelo owodwa ngemva kokuba ngutshiki lobhanqa leqembu le Bulawayo Chiefs.
Ekhuluma ngemva komdlalo uMwaruwari uthe uyawujabulela kakhulu lowo mklomelo.
“Bekuvele kuzakuba nzima emdlalweni wami wakuqala njengoba besidlala singekho ngekhaya kodwa ukuthola esikwenze umklomelo owodwa kuyinto enhle kakhulu njalo kuzasiphathisa kwelizayo,” kutsho uMwaruwari.
Ngakwelinye icele umqeqetshi weqembu le Bulawayo Chiefs uNilton Terroso uthi akayesabeli ukuba usengaphelelwa ngumsebenzi loba nje esehambe imidlalo eminengi enganqobi.
“Angikakuzwa ukutshisekana okubangwa yikuba inkokheli zeqembu kazithokozanga. Mina engikukhangeleyo yikuba umlandu wami ngowokuba ngithuthukise indlela esidlala ngayo njalo nxa abadlali bekhombisa ukuba basazimisele ukungidlalela konke kuyabe kulungile kimi,” kutsho uTerroso.
Iqembu le Bulawayo Chiefs lihlezi endaweni yetshumi lambili engalaneni yemiklomelo njalo ensukwini ezedluleyo limise umsebenzi abasekeli baka Terroso uMark Mathe kanye lo Farai Tawachera kwathi esikhundleni sabo laphendukisa uThulani Sibanda, owayevele engumqeqetshi waleliqembu phambilini kokuqhatshwa kuka Terroso.
Emsileni wengalane iqembu le Whawha liqhubekela phambili lijeke amanye njalo ngempelaviki eyedluleyo linqotshwe nge 1 ka nya ngele FC Platinum.
Endaweni yesibili nxa usuka emsileni kule Bulawayo City yona enqotshwe nge 2 ka 1 yi Cranborne Bullets.
Iqembu le Whawha lilemiklomelo emihlanu kuthi ele Bulawayo City lilemiklomelo eyisithupha.