GABORONE - Umphathintambo obona ngezokungena lokuhlala kweleBotswana uthi bangemuva kuhlelo lwabo lokuhluza izicelo zabokuza, okugoqela inengi elidabuka eZimbabwe, abafuna ukuthola amaphepha awokuba ngabe Botswana -awecitizenship.
Abanye abeZimbabwe bafuna ukufulathela ilizwe labo ngenxa yokungahlaliseki kwesimo somnotho kanye lese zombusazwe.
Ugatsha olubona ngezokungena lenhlalo yabantu kwele Botswana olwe-Immigration luthi luhlangana lenkinga ezithile, yikho lungenelisi ukuthi luhluze izicelo zabokuza ngesikhathi esifaneleyo.
Unkosikazi Anna Mokgethi umpathintambo walolugatsha uthi kulabokuza abaphose bafike inkulungwane eyodwa, kulamakhulu ayisithupha abeZimbabwe, kuthi elinye inani eliphezulu lingele India kanye leSouth Africa.
“Ngiyazi ukuthi kulabantu abanengi asebelinde okweminyaka ukuthi kukhangelisiswe izicelo zabo zokuthi babe ngabeBotswana. Ngiyavuma ukuthi kwesinye isikhathi siyehluleka ukugcwalisa izithembiso zethu zokunceda abantu ngokuphangisa”
Abanye beZimbabwe abafuna ukuthola amaphepha akwele Botswana,ngabatshade izizalwane zeBotswana, kukanti abanye bavule amabhizimusi. Abanye njalo ngasebahlala iminyaka edlula elitshumi kweleBotswana, osekubavumela ukuthi bafake isecelo sokuthi bathole amaphepha okuba ngabeBotswana, icitizenship.
UMnu. Cephas Tshuma, oweZimbabwe oseleminyaka eminengi ehlala eBotswana, uthi kumele eleBotswana licace ngemithetho ye-citizenship.
“Indaba le iyahlupha ngoba uyathola umuntu oseleminyaka edlula amatshumi amabili kodwa engaphiwa amaphepha. Njengabantu bokuza, ngabe kuyacaca ukuthi kuhamba njani ngoba kuyamangalisa ukuthi abantu ngemva kokuhlala isikhathi bayancitshwa amaphepha.”
Uthi ngitsho abakubhizimusi bazithola bebhakane lokufanayo, bengazi ukuthi ikusasa yabo ime kanjani.
“Ungaze uyenze imali kumbe ufake imali kubhizimusi awulaqiniso ukuthi kusasa bayakuxotsha. Siyathaba nxa sebeyikhuluma edale lephalamende. Sifisa ukuthi ngabe bayakhulimsa lathi njengabokuza ukuze bazwe imbono yethu phezu kodaba lolu.”
Inengi eselifisa ukuhlala kweleBotswana lifuqwa yisimo esomnotho kanye lesombusazwe esingaguquki kangako eZimbabwe, kukanti kweleBotswana kusese nganeno.
UMnu. Dumezweni Ncube uthi udubo ekhaya yibo oluxotsha abantu ekhaya.
“Silapha sicina sidinga icitizenship kwamanye amazwe. Kungayisikho lokho ngabesizihlalele ekhaya. Akuhlaleki ekhaya, umbuso awusiphathi kahle njalo asijabulanga.”
Ugatsha olubamba izicelo zokuthi abantu bathole amaphepha kweleBotswana luthi ukuhluzwa kwezicelo lezi kanye lokunikeza abantu impendulo, akumelanga kudlule umnyaka lengxwenye (18months).
Njalo uMokgethi uthi abeZimbabwe bathatha ilanga elilodwa ukuphathiswa ukuthi balahle ukuba yizizalwane zakulelozwe (irenounciation), uma bephumelele kuzicelo zokuguqula ukuba yisizalwane seZimbabwe kumbe icitizenship yasekhaya.