Annahstacia Ndlovu
Bathokoze kakhulu abanqobe kukhetho lwama by-elections kwathi labo abakhe phansi bathembisa ukuba bazakwenza ngcono kukhetho oluzakwenziwa ngomnyaka ozayo. Kulabantu abalutshwana abavote kukhetho lolu.
Omunye wabathakazelele impumela yokhetho lolu nguNkosikazi Sichelesile Mahlangu, onqobe esigabeni sePumula ngamavoti adlula inkulungwane ezintathu- 3,092. Kodwa uNkosikazi Mahlangu, okubandla leCitizens Coalition for Change, udaniswa linani eliphansi labantu abavote kukhetho lolu.
UNkosikazi Janet Moyo, okubandla leZanu PF obengene kukhetho kuWard 21 wanqotshwa, uthi kakabi lamazwi usakhokha umoya.
Isikhulumi sebandla leCCC koBulawayo, uMnu. Swithern Chirowodza, uthi uzulu uveze ukuthakazelela ibandla leli kukhetho lolu.
UMnu. Joseph Tshuma okubandla leZanu PF uthi luqhutshwe ngemfanelo ukhetho lwama by-elections.
UMnu. Effie Ncube, ingcwethi kwezombusazwe ezimeleyo, uthi yebo ibandla leCCC linqobile kodwa abantu abaphumanga ngobunengi besiyavota.
UMfundisi Useni Sibanda, umqondisi weZimbabwe Christian Alliance, uvumelana loNcube.
Isakhamuzi esihlala kuWard 21 esivotileyo, uMnu. Evance Njomane, uthi kulowo onqobileyo bakhangelele intuthuko lokulungiswa kwemigwaqo emahlephuhlephu.
Kukhangelelwe ukuba kuzakwenziwa imicimbi etshiyeneyo yalabo abanqobe kukhetho lolu endaweni ezinengi koBulawayo.
Kubikwa ukuba abanye abakubandla leZanu PF sebesilwa okumangalisayo ngempumela yokhetho lwama by-elections. Abanye bathi kumele bonke abathole impuphu lokunye beveze ukuba bavotele ibandla liphi.