Indwendwe zabavoti bezizimfitshane kakhulu ko Bulawayo okubangele ukuthi abantu bengalindi isikhathi eside ukuthi bavote.
Umuntu obevata ubeqala ahlole ukuthi igama lakhe likhona na kuluhlu lwabavoti kumbe hatshi engakangeni endlini yokuvotela. Nxa umuntu esephakathi kwalindlu ubethathwa imininingwane yakhe, kuhlulisiswa ukuthi ngempela nguye na uqobolo lwakhe ozovota qede aphiwe iphepha lokuvota.
Ngeva kwalokho umuntu ubefakwa uphawu lokuthi uvotile njalo engazalokothe avote okwesibili abesebhalwa igama lakhe.
Ibandla le Citizens Coalition for Change likhonone ngokulotshwa phansi kwamagama abavoti.
lsakhamuzi sakoBulawayo eTshabalala kuWard 21, uNkosikazi Florence Moyo uthi uvote kuhle njalo ngokuthula.
"Ngivela vota kodwa ekuvoteni abantu bakhanya bebalutshwane. Khathesi kulesiqiniseko sokuthi umuntu ngeke aqile ngoba sikhangelwa ngabantu abahlukeneyo bekhangela lezithupha zethu ukuthi baqiniseke ukuba umuntu ovotayo nguye sibili kusukela phandle uze uyefika ebhokisini. Uyazivotela kahle kakho okukhangelayo kumbe okunyonkolozayo uyazivotela kuhle."
Isakhamuzi seNkulumane uThembelani Dlamini uthi kumele avote kuWard 24 kodwa lapho avame ukuvotela khona lonyaka akuvotelwa.
"Ukhetho ngililungiselele iZEC asisakwazi ukubala kwakhona singazi ukuthi kuzahamba njani ibizo lami belingekho ngale esivotela khona kuthiwa ngivota kuward 24 lonyaka anagzi ukuthi kuzakuba lomehluko sikhangelele untshintsho ngoba siyahlupheka lapha."
Omunye wezakhamuzi zakoBulawayo oyenelise ukuvota uMnu Evance Njomane uthi ukhetho lwalonyaka lubalulekile ukhangelele intuthuko kulowo ozanqoba ngoba imigwaqo ayihambeki.
"Sengivotile mama yonke into ibilula awudubeki ukuthi uvote uthola lonke uncedo awuhlali more than 5 minutes ukuvota yonke into ibalulekile akulamsindo ogogo bayangena bayaphuma bayavota akulankinga lapha kuWard 21.''
Umkhokheli wabatsha kubandla leZANU-PF koBulawayo uFreedom Murechu oqopha ukhetho uthi ukhetho luhambe kuhle kodwa balokukhathazeka ngokubalabantu abanengi ababhalisele ukuvota kwezinye izindlu zesigaba seNkulumane.
''Silakho esesikunanzelele njengebandla lapha eNkulumane uyathola ukuba abantu abanengi bayab bebhalisele ukuvota bebanengi okwamagama ngaphansi kwendlu eyodwa ngakho iZEC sekumele yenze uphenyo ubone ukuba ngempela laba abantu bahlala kulezondawo mhlawumbe ngabantu abathathwa eNgozimine lakubomgzuza ukuthi bazovota ngapha yikho ukuqila kwakhona khonokho.''
Olwela amalungelo oluntu uMnu Effie Ncube uthi ukhetho lwalamhlanje ngeke athi lukhululekile ngoba phambilini kwalo kubelezikhubeko ezithile.
''Ukhetho lwalamhlanje akusoze kube lukhetho olukhululekileyo ngoba kubelokuvinjelwa okukhulu lodlakela kumabandla aphikisayo labasekela amaqembu aphikisayo lalabo abaqopha ukhetho bayaxotshwa ngakhoke abasoke babelabantu abazabakhangelela ukhetho okutsho ukuthi lolukhetho alukhululekanga ngoba akulanjongo yokuthi lukhululeke. ibandla elibusayo lithole usekelo olukhulu kumisakazo kuthi amabandla aphikisayo abakutholanga lokho.''
Inengi labaxoxe leStudio 7 ngemva kokuvota lithi ukhetho luhambe kuhle sibili ngoba iphepha lokuvota licacile okokuthi umuntu kangeke avotela ongayisuye amfunayo njalo lophawu lokuvota olombala okucikilicane wesandla sokhohlo lubalulekile njalo aluchitsheki lula okuzenza kubenzima ukuvota kabili.
Ukhetho lwalamhlanje lugcwalisa izikhundla zamalunga edale lephalamende ezingamatshumi amabili lasithoba minwe mibili, 28, lezamakhansili ezedlula ikhulu, 117 elizweni jikelele. Inenig lezikhundla lezi zabakhona kulandela ukuxotshwa kwamalunga ebandla leMDC Alliance edale lakukhansili libandla leMDC-T lisebenzisa umthetho wezokhetho ovumela lokhu.
Your browser doesn’t support HTML5
Udaba Silethulelwa nguAnnahstacia Ndlovu