Umkhokheli welinye lamacele aweMovement for Democratic Change-T, uNkosazana Thokozani Khuphe uthi kukhetho lwamaBy-elections, olwenziwa NgoMgqibelo waliviki, ukhuthaza wonke amalunga ebandla lakhe ukuthi avotele abancintisa bemele ibandla ele Citizens Coalition for Change.
UNkosazana Khuphe wethule linkuthazo emhlanganweni awenze lentathelizindaba, koBulawayo, NgoMvulo.
Isikhulumi seMDC-T uMnu Ndodana Ndlovu uchaza kabanzi inkulumo kaMaKhuphe.
“UDokotela Khuphe ubelomhlangano lamhlanje koBulawayo njengoba wayethembisile kumaviki adlule ukuba uzaphaphama lapho ame khona kumaby-election lakukhetho oluzayo ngakho usekhuthaze wonke amalunga ebandla lakhe ukuba Mhlaka 26 March bavotele amalunga ebandla leCCC ezweni lonke ukuze ibandla leZanu linganqobi. UDokotela Khuphe uqhubekele phambili ethi lakumnyaka ozayo wonke umuntu avotele umongameli weCCC uMnu Nelson Chamisa ngoba ibandla leZanu alibusi kahle.”
Ingcwethi ehlaziya ezombusazwe uNkosikazi Connie Mpala uncoma inyathela likaMaKhuphe.
“UDokotela Khuphe uthethe inyathela elihle kakhulu lokusekela ibandla le CCC ngoba lokhu kuzakwenza ukuba ibandla leZanu lingaphimeleli lapho amabandla wonke aphikisayo engaya kukhetho benambene ngoba okwamanje abantu beZimbabwe abakhokhelwa ngendlela.”
Isikhulumi seCCC koBulawayo, uMnu Swithern Chirowodza uthi kulinyathela elihle elithethwe nguNkosazana Khuphe.
”Kuyathokozisa ukuzwa abantu abanengi besekela ibandla lethu leCCC kwenza sizizwe sikhusumala buye kuyinto enhle ukusekelwa ngabantu abanengi.”
Mhlaka 26 Mbimbitho izwe liya kukhetho libuyisela inkokheli zekhansili lezedale lephalamende ezaxotshiswa ezikhundleni ngendaba zokundonselana kumabandla aphikisayo.
Ngasikhathi sinye abekhomishini eqondisa ezokhetho eyeZimbabwe Electoral Commssion bephakathi kohlelo lwabo lokubhalisa abantu ukuba bathole ilungelo lokuvota, olweVoter Registration kulungiselelelwa lokubumba izigaba ezintsha zokhetho luka2023.