Sithwale nzima isikhulumeli seqembu lenguqu ele Highlanders FC, uRonald Moyo ukuchasisa ukungabuyi komqeqetshi waleli qembu, uMandla Mpofu ukuzoxoxisana lentathelizindaba namhlanje.
UMoyo, obeveze ukumangala ngesikhathi ebona umsekeli kamqeqetshi weqembu leBosso uBekithemba Ndlovu kunguye ozoxoxisana lentatheli zemidlalo, ucatshe ngomunwe ngesikhathi esebuzwa zintatheli ukuba kungani uMpofu engabuyanga ukuzohlangana lentatheli njengenhlalayenza.
“Kuliphutha ukuba lokhu bekungenzakali esikhathini esedluleyo kodwa ngenxa yokuba nguye ozibambe esidukwini ulawo amandla awokuthuma abasekeli bakhe.
Okwanamhlanje bekukhona obekumele akwenze okuphathelane lemuli yakhe yikho ethume uBeke ukuthi azomela. Akulanto embi ekhona,” kutsho uMoyo.
Abasiki bebunda bathi uMpofu uphiwe imidlalo emithathu okumele athole khona imiklomelo eyisikhombisa njalo okwamanje uhlezi phezu kwemiklomelo emine.
Kowakuqala uthole umklomelo owodwa iqembu le Bosso lize libe ngutshiki lobhanqa lele Tenax kwathi kowesibili uthole imiklomelo emithathu lize linqobe ele Herentals.
Eminye emithathu kumele ivele kumdlalo wangeSonto lapho iqembu le Highlanders elizadlala khona lele Caps United esigodlweni iHarare.
UNdlovu utshele intathelizindaba zemidlalo ukuba awusoze ube lula lowomdlalo.
“Nxa sikhuluma ngeqembu le Caps sibabukele bedlala leqembu le Bulawayo City njalo labo basibukele sidlala ngeSonto okutsho ukuba womabili amaqembu azabe efihle induku emqubeni.
Sabona ukuba baqine ngaphi, lalapho okulezikhexe khona, yikho ke besisebenza silenjongo okokuthi mzwana welanga siyabe sihlome saphelela. Kodwa labo basilindile njengoba labo bathola ithuba elokubona ukuba simi njani,” kutsho uNdlovu.
Iqembu le Highlanders lenelise ukuhlohla amagoli amane ngeSonto eyedluleyo njalo omunye wabagadli abahlohlileyo uStanley Ngala uthi ukhangelele ukuba baqhubekele phambili belithela emambuleni.
“Iqembu belingahlohli okwesikhathi eside kodwa khathesi amasango asevulekile. Kuyangijabulisa ukuba senelisa ukusebenzisa amathuba njalo lokhu kwenza siye kumdlalo wangempelaviki silokuzithemba njalo kuyisifiso sami ukuba siqhubekele phambili sisenza kuhle,” kutsho uNgala.
Abafana be Bosso balemiklomelo eyithoba minwe mbili ngemva kokudlala imidlalo eyisikhombisa njalo ngeSonto bazavakatshela ele Caps United esigodlweni iHarare.
Eminye imidlalo yangempelaviki kusigaba se Premier Soccer League izadlalwa ngokulandelayo.
NgoMgqibelo iqembu le Chicken Inn lizadlala lele Black Rhinos ngase Luveve, iqembu le Yadah lizemukela ele Bulawayo City ngase Baobab, iqembu le FC Platinum lizangqikilana lele Ngezi Platinum Stars ngase Mandava, iqembu le Dynamos lizadibana lele ZPC Kariba ngase National Sport Stadium.
NgeSonto iqembu le Tenax lizadlala lele Herentals ngase Sakubva, iqembu le Bulawayo Chiefs lizemukela ele Harare City ngase Luveve, iqembu le Triangle lizangqikilana lele Whawha ngase Gibbo kuthi ele Cranborne Bullets lizadlala lele Manica Diamonds ngase Baobab.