Amazwe afika phose amakhulu amabili – 190 agoqela eleZimbabwe asembukisweni omkhulu owe2020 World Expo eDubai kwele United Arab Emirates.
Umbukiso lo wamiswa ngabaqondisi bawo kulandela ukuqhamuka kobhubhane lweCOVID-19 ngomnyaka ka2020. Abohlangothi lukahulumende olubona ngokwethekelelwa kwelizwe, olweZimbabwe Tourism Authority, abaqondisi bamankampani abadabuka eZimbabwe lakwamanye amazwe, babukisa imisebenzi yabo lempahla etshiyeneyo.
UMnu. Chief Koti okuhlangothi lweZimbabwe Tourism Authority
NgoMvulo kwenziwe umcimbi omkhulu kulumbukiso kulusuku olwabekwa ngabe Dubai 2020 Expo abalubiza Zimbabwe National Day lapho eleZimbabwe belinikezwe ithuba lokuthi libukise njalo libonise umhlaba ngelikwenzayo, kwezomculo, imigido, lezamasiko.
Konke lokhu bekuyinjongo yokukhanga izethekeli ukuthi zibuye eZimbabwe. UMnu Chief Koti nguMqondisi kuZimbabwe Tourism Authority ochasisa kabanzi nge Dubai 2020 Expo Zimbabwe National Day.
"NgoMvulo bekulilanga lokuthakazelela ilizwe laseZimbabwe eExpo. Kuhambe uMongameli welizwe akade exhaswe ngabaphathintambo ababona ngengatsha ezehlukeneyo elizweni lase Zimbabwe. Kubelomdlalo omkhulu kakhulu okade unanzelela, uthakazelela njalo ilanga lalamuhla leli ekade libekiwe kuExpo ukuthi lilanga leZimbabwe. Sizabe siqhubekela phambili ukukhwabathekisa izethekeli ukuthi zibuye kulelilizwe laseZimbabwe."
UMnu Nicholas Moyo, umqondisi weNational Arts Council of Zimbabwe, uthi banengi abathakazelela ezemidlalo lokunye okwenziwa ngabantu eZimbabwe.
"Abenelisa ukubuya bazo invester eZimbabwe eyinye into emangalisayo kakhulu yindaba zezemidlalo lezamasiko. Sibona lapha ezamasiko ziyizo eziqala kakhulu kuZone One nxa ungena kuPavillion yeZimbabwe kukhulunywa ngokuthi esilakho eZimbabwe kuyini, imgido yethu iminjani, amaqembu ayenza kuhle mangaki, yiwaphi.”
Abaculi abasembukisweni we2020 World Expo eDubai.
Abaculi beZimbabwe uMoyo uthi betshaye kwazwakala kulumbukiso.
"I-art yethu ikwelinye ibanga njalo amagroup la amalutshwane abuyileyo abuye ayisebenzisa lindawo kakhulu ukuze bathole eminye imisebenzi. Sikhangelele ukuthi ngemva kwalokhu okwenzakalayo lapha sibesesikwazi ukuthi imisebenzi etholakeleyo kwezemidlalo ingaba mikhulu kangakanani."
Ngaphandle kuka Jah Prayzah ojabulise abantu kulindawo umculi olodumo wako Bulawayo, uSandra Ndebele, unikeze uzulu ukudla kwamehlo lendlebe. Yenake uMaNdebele uthi usuthisekile ngohambo lwakhe eDubai.
"Siyaziqhenya ngoba siliphakamisile iflag laseZimbabwe, wonke umuntu ukhuluma ngezintombi zomqangala osisi abatshayi ingungu, osisi abagidimtshongoyo, isitshikitsha, indlamu. Ngiyabonga kakhulu iZiimbabwe ngokusisekela okungaka lokusinika iplatform leyi yokuthi sihambe siyesukumisa iZimbabwe lokuthi abantu bazi ukuthi kunengi abangakuthola ngaseZimbabwe."
Umculi olodumo uSandra Ndebele loKirsty Coventry, umphathintambo wezemidlalo.
Iqembu lezomdabu eligoqela abaculi bakoBulawayo abatshiyeneyo ababizwa ngokuthi yiSongs of Lozikeyi, batshaye kwazwela uzulu olapho wasala ecela umphehlo . UMnu Saimon Mambazo ngumqondisi waleliqembu.
"Besiperformer sitshengjsa inkokheli zaseZimbabwe ngenxa yokubana bekulilanga okuthiwa yi Zimbabwe National Day. Hayi kuhambe kuhle abantu basithakazelele. Umdlalo lo othi Songs Of Queen Lozikeyi, uyabonisa ukubana sikhulise amagama enkokheli ezadlulayo oLozikeyi, oLobengula, abantu abanengi esesibakhohliwe oJoshua Mqabuko Nkomo, bonke abakhokheli abenza iZiimbabwe yaba yilokhu eyikho."
EleZimbabwe lenzile konke okumele likwenze kulumbukiso lizama ngamandla wonke ukuthi amanye amazwe azotshala imali elizweni, ukuvula amabhizinisi kanye lokukhanga izethekeli ukuba zibuye ngobunengu.
Umbuzo yikuthi kambe lumbukiso weDubai uzanceda ukuthuthukisa ezomnotho weZimbabwe na? iskhathi yiso esizakutsho.