Umphathintambo wezemfundo ye-primary leye secondary, uNkosikazi Evelyn Ndlovu, uthi kuyisifiso sogatsha lwakhe ukuthi kuqhatshwe ababalisi ezabelweni abavela kizo ukuze bazwisise okufunwa ngabantwana ikakhulu abaqala imfundo yeprimary.
Ekhuluma phambi kwekhomiti yedale le phalamende, ebona ngezemfundo eye Parliamentary Portifolio Committee on Education, uNkosikazi Ndlovu uthe abantwana bezikolo kumele bathole usizo kubabablisi abakhuluma indimi zabo esithi lokhu kulakho ukuncedisa ukuba benze kuhle ezifundweni zabo lakumihloliso.
Lokhu kuza ngemva kokuba izikolo ezinengi esabelweni seMatebeland North zibe lenani elikhulu labantwana abengenzanga kuhle emihlolisweni kaGrade 7 ukwedlula ezinye izabelo elizweni jikelele.
Lokhu kubikwa kubangelwe yizizatho ezinengi ezigoqela ukuqhamuka kobhubhane lweCovid 19 kanye lodubo olbethwe nguNkosikazi Ndlovu lwababalisi abangakhulumi ulimi lwabantwana ababafundisayo lokubaleka kwabanye ababalisi ezikolwe ezisendaweni ezifana leBinga eMatebeland North lase Rushinga eMashonaland Central.
Isikhulumeli senhlanganiso yababalisi eyeAmalgamated Rural Teachers Union, uMnu. Thembakuye Moyo, uthi bavumelana lompathintambo wezemfundo yePrimary leSecondary.
“Thina njene ARTUZ nxa kukhulunywa ngababalisi sifuna I devolution. Lokhu kuzasinceda ukuba ababalisi lezesebenzi kube ngabantu abasuku kulezondawo bekwazi amasiko alabo bantu”
UNkosikazi Nokuthula Hlabangana Mpofu, weyinye njalo inhlanganiso yababalisi eyeProgressive Teachers Union of Zimbabwe, uthi kumele uhulumende azame ukuguqula imfundo ikakhulu ezikolweni zemaphandleni.
“Thina njenge PTUZ sithi lindaba le yokuqhatsha ababalisi ezigabreni akulani lempumelela yabantwana besikolo ngoba abantwana kumele abantwana bathole imfundo yohlonzi.”
UMnu. Liberty Sithole, ongumzali, uthi kuyadanisa ukuba abantwana beyehluleka ukuphumelela kumihloliso ngenxa yababalisi abavela kwezinye indawo.
“Kuyinto enhle ukuba uhulumende akhangele loludubo ngoba thina njebabazali kuyasidanisa ukuba abantwana bayehluleka ngenxa yolimi olungasalwabo olukhulunywa kwezinye izikolo.”
UNkosikazi Ndlovu uphinde waphatha udubo olubhekane labantwana abangantombazana abanengi ezikolweni abathwele nzima ngokuswela imvunulo yokugqoka nxa besesikhathini esithi okwamanje lokhu becela ukwengezelelwa imali abayabelwa nguhulumende njengogatsha lwezemfundo, kuBudget, ukuze lwenelise ukuphathisa abantwana abangamantombazana ukufinyelela limvunulo.