Kulesigebengu esingenele enye imuli endlini izolo eHarare sadubula owesifazana oleminyaka engamatshumi amathathu lanye, 31, wafa ngemva kokumtshontshela imali engangeUS$60 kanye labomakhalekhukhwini.
Amapholisa athi umsolwa ubehlome ngovolovolo njalo evale ubuso nge-mask.
Athi utshaye ugogo oleminyaka engamatshumi phose ayisitshiyangalombili, 78, kulindlu eWaterfalls ngogodo kwathi omunye owesifazana lo ezama ukumbamba wamdubula ekhanda wahle wafa.
Isikhulumeli samapholisa uMnu Paul Nyathi ukhuthaze abangaba lolwazi ngesigebengu lesi ukuthi baze phambili.
Ubugebengu babantu abatshontsha behlomile sobubhahile kakhulu elizweni.
NgoMgqibelo umthethwandaba webutho koBulawayo ugwebe amasotsha amathathu ukuthi apike okweminyaka elitshumi lanhlanu, 15, ngamunye ngemva kokuwafumana elamacala okubamba inkunzi ehlomile, ukugqekeza lokutshontsha.
Abathathu laba nguFortune Ndlovu, uRatiel Manyanga loKainos Masase. Ibutho lithi bebesebenzela e-4 Infantry Brigade eMasvingo njalo bonke bahle baxotshwa umsebenzi.
UNtungamili Nkomo weStudio 7 uxoxe lomeli weSoutherton ephalamende uMnu Peter Moyo.