Lidonsa nzima iqembu lomdlalo wenguqu ele Highlanders kulezinsuku njengoba labasakhulayo abe Bosso 90 labo bethwele amagabh’avuzayo esigabeni seSouthern Region Division One Soccer League.
Iqembu le Bosso 90 lihlezi endaweni yesine nxa usuka emsileni wengalane yemiklomelo kusigaba se Southern Region Division One Soccer League ngemva kokudlala imidlalo eyithoba minwe mbili.
Umsekeli kamqeqetshi weqembu leBosso 90 uSiza Khoza uthi lesisimo sesibalalisa begqoke izicathulo.
“Sikhathazeke kakhulu ngokunqotshwa mihla ngemihla. Ekuqaleni besisithi kungcono ngoba besisiba ngutshiki lobhanqa sithola umklomelo owodwa kodwa khathesi sesilahlekelwa yimiklomelo yonke yomithathu.
Yebo kambe thina owethu umsebenzi ngowokukhulisa abafana kodwa lempumela layo iqakathekile. Yikho kuzamele sithole indlela eyokuba sibakhulise abafana kodwa ngasikhathi sinye sithola impumela enhle,” kutsho uKhoza.
Phezu kwengalane yesigaba se Southern Region Division One kuhlezi iqembu le Hwange lona elilemiklomelo engamatshumi amabili njalo elitshiya ele Arenel elihlezi endaweni yesibili ngemiklomelo emine.
Loba kunjalo umqeqetshi weqembu le Hwange uBongani Mafu uthi yena umango usemude kumkhankaso wokudinga iqembu elizathola ilungelo elokuyadlala kusigaba se Premier Soccer League ngomnyaka ozayo.
“Eqinisweni akukakhanyi ngoba sonke amathimini lapha sisazama ukuthi sikhulise ukuqina kwabadlali bonke. Amaqembu asengathi aselabadlali asebeqinile khathesi yikho sekunzima njalo wonke umuntu okusigaba sika division one ulethuba lokuphumelela ekucineni. Kusavulekile, angeke sithi ubani usenjani.
Thina njenge Hwange sekumele ukuthi sizilungiselele. Kulimpelaviki ebuyayo sidlala leqembu le Ratanang, iqembu eliqeqetsha ngamadoda alolwazi lokudlala kanye lolwazi lokuqeqetsha.
Ngiyakhuleka kuNkulunkulu ukuba sithole impumela enhle, bengasidili ezinengi thina sithole imiklomelo emithathu,” kutsho uMafu.
Kumidlalo eyeviki lethoba munwe munye ezakuba khona ngempelaviki ezayo, iqembu le Hwange lizavakatshela ele Ratanang, lona elihlezi endaweni yesithathu engalaneni yemiklomelo.
Lumdlalo uzakuba enkundleni ye Luveve B Arena ngehola letshumi lambili emini ikanti emini kuzakuba lomdlalo phakathi kweqembu le Bosso 90 kanye lele Indosakusa enkundleni efanayo.
Umqeqetshi weqembu le Indosakusa uXolani Kundlande uthi bakhangelele ukwala belokhu bedobha imiklomelo ngokuqhubeka kwemmidlalo.
“Sikhangela umdlalo ngamunye ngamunye njalo senza okusemandleni ethu ukuba sithole impumela enhle. Khathesi sesikhangele umdlalo wethu le Bosso 90 njalo lakho sikhangelele impumela enhle,” kutsho uKundlande.
Eminye imidlalo ehlelwe ukuba idlalwe ngempelaviki ezayo imi kanje;
NgoMqgibelo iqembu le Arenel Movers lizadlala lele ZPC Hwange enkundleni ye Luveve ngehola letshumi lambili kuthi ngehola lesithathu emini iqembu le CIWU lizadlala lele Talen Vision.
Iqembu le Mosi Rovers lizadlala lele Makhandeni Pirates enkundleni ye Chinotimba ese Victoria Falls, iqembu le Casmyn lizemukela ele Quality Foods ngase Turk Mine, kuthi iqembu le Mainline lizadlala lele Indlovu Iyanyathela ngase Plumtree.
NgeSonto iqembu le Zimbabwe Saints lizadibana lele Ajax Hotspurs ngase Luveve B Arena ngehola letshumi lambili kuthi emini ngehola lesithathu iqembu le Mountain Climbers lizadlala lele Binga Pirates enkundleni efanayo.
Your browser doesn’t support HTML5
Ezemidlalo siloJoseph Njanji