Abadabuka eZimbabwe abanengi abaphansi kohlelo lweZimbabweans Special Permits, kabasoze benelise ukulungisa amaphepha okuhlala kwele South Africa ngenxa yokuthi kabangeni kunhlelo zonke zama visa ahlelwe luhlangothi lukahulumende olubona ngezethekeli lendaba zekhaya.
Abaxoxe leStudio 7 namuhla bekwele South Africa bathi konke okufunwa nguhulumende wakwele South Africa, okunjengokuba lengcwadi eziveza ukuthi bakhaliphile emisebenzini eqakathekileyo, kabalakho ngakho-ke balakho ukubiselwa eZimbabwe ngenkani nguhulumende kungedlula umhlaka 31 Mpalakazi lonyaka.
Inengi labo ngabasebenza emavinkilini, ezitolo ezithengisa impahla, emakhitshini leminye imisebenzi engenziwa ngabadabuka kwele South Africa.
Abaphansi kohlelo lweZimbabweans Special Permits bedlula inkulungwane ezingamakhulu amabili lamatshumi ayisikhombisa – 272,000.
UMnu. Bongani Mkhwananzi, owenhlanganiso yeZimbabwe Community in South Africa, uthi banengi abangasoze benelise ukuthola amaphepha aqondileyo ukuze behlale kwele South Africa.