Abafundi besikolo seGwakwe Primary esigabeni seMatabeleland South sebesesaba ukuya esikolo ngenxa yondofa okubikwa ehlukumeza amantombazana alesisikolo.
NgoLwesine abezinkonzo kanye labosiwalu bahlangene kulesisikolo ukuyazama ukuxotsha lundofa.
Izakhamizi esixoxe lazo zididekile ngalezizehlakalo ezenzakala kulesisikolo osekudale ukuthi inengi labafundi lizihlalele emakhaya lingasayi esikolo ngokwesaba ondofa laba.
Abafundi laba kubikwa besithi bengabona lowogogo beqaleke, babhubhudle amagwebu emlonyeni besebephela amandla.
UMnu Biafa Mathe ongutshalimana wekomidi yabazali besikolo seGwakwe uthi sokulesikhathi abafundi bengafundi kakuhle besithi kulogogo olamazinyo athonta igazi abambonayo.
“Sekulamaviki amathathu kusenzakala lokhu, abantwana bebesithi bengafika esikolo bafundi ngesikhathi ubone umntwana sebhubhudla igwebu, ekhipha igwebu awele phansi abesephela amandla kwahamba kusenzakala ebantwaneni abanengi ngezigaba, abantwana bathi babo a ugogo ohamba egxoza indenda ezilegazi bangambona bethuke, nxa amatitsha ebhala emdulini bayambona lugogo behluleke lokufunda," kutsho uMathe.
UMathe uthi lokhu sekutshiye abafundi kanye lababalisi bedlela evalweni.
“Kathesi abanye abantwana abasayi esikolo ngenxa yokwesaba lababalisi sebesethuka ukuthi kungaqhubekela phambili kuzalimaza abantwana,” kutsho uMathe.
Omunye walabo abahlaselwe ngulugogo nguntombazana oleminyaka yokuzalwa eyisithupha okubanga lakuqala kulesisikolo, sixoxe logogo wakhe othi wabizwa esikolo umzukulu wakhe seqalekile.
“Ngithe ngifika ngamthola bembathise ingubo ngayivula ngathola egxoza indenda lamehlo setshilene semhlophe nke sazama ukuthi sigijime laye siye ebantwini inyawo zakhe zaseziqanda kwathatha amahola amabili ukuze aphaphame.”
UNkosikazi Maretha Sibanda uthi bakhathazekile ngekusasa yabantwababo ngoba bengasayi esikolo.
“EGwakwe silohlupho lokuthi abantwana bayawa siqalise lathi sisithi ngamanga kodwa sesibona abantwana beqaleka batshaywe yiStroke siyafisa ukuthi ngabe siyathola uncedo ngoba abantwana laba yikusasa yethu.”
UMnu Bigboy Mhlanga nguSobhuku njalo ngumfundisi webandla leFoutain of Faith Ministries. UMhlanga uthi seke wakhulekela abanye abafundi kulesisikolo.
“Lami ngabona abantwana bakhona, lanxa usithi uyambamba umuntu wakhona uba lo kwesaba, into yakhona iyabaqeda amandla njalo ithanda ukwenza amankazana, bathi ugogo wakhona kakhulumi, ulamazinyo acijileyo njalo uyabe ethwele ingqamu ebethusela,” kutsho uMhlanga.
UMhlanga uthi ngoLwesine bahlangene labezomdabu bezama ukuxotsha lundofa ukuze abafundi babuyele esikolo.
Inengi labazali lithi nxa lokhu kungaqhubekela phambili kuzamele bagcine abantwababo emakhaya lapho abazavikeleka khona.
Your browser doesn’t support HTML5
Udaba Silethulelwa nguAnnastacia Ndlovu