Umsekeli kamongameli welizwe engumsekeli njalo womkhokheli webandla leZanu PF, uMnu. Constantino Chiwenga, ukhuthaza abantu eZimbabwe ukuba behlukane lomkhuba wodlakela ngesikhathi sokhetho.
UChiwenga wethule amazwi la ngoLwesihlanu koBulawayo emhlanganweni wokukhankasela ukhetho oluzayo ePumula.
Uthe abantu bakwele Zimbabwe kumele behloniphane ngoba yibo abanikazi belizwe.
UChiwenga ugcizelele esithi abantu bakwele Zimbabwe baziwa ngokuthula hatshi udlakela.
“Kukhetho lolu olukhona asifuni dlakela, sonke kumele singavumelani lodlakela. Siyalusola kakhulu. Udlakela alula ntuthuko, kulabo abakwezombusazwe bephikisa kumele bazi ukuthi abasoke behlale belapho, singobhudi labosisi belizwe sihlanganiswa ligazi elachitheka sikhulula ilizwe olukumbala weflag yethu...”
Umgcinisihlalo webandla leZANU-PF koBulawayo, uMnu. Jabulani Sibanda, okhulume emhlanganweni lo uthe kumele kubelokuthula ngesikhathi sokukhankasela ukhetho oluzakwenziwa ekupheleni kwenyanga.
“Sonke asibambane singehlukaniswa ngomhlobo kumbe ngombala njalo umuntu lomuntu kumele azazi, azi lalapho asuka khona ukuze sizazi ukuthi singabako bani, ukuze sazi ukuthi okwakethu yikuphi.”
Osakhulayo webandla leZANU-PF, uFreedom Murechu, uthi bayayizwisisa inkuthazo yenkokheli yabo yokutshiyana lodlakela.
“Thina njengabasakhulayo bebandla elibusayo siyalalela inkokheli zethu ukuba singaphatheki kudlakela okukhona yikuthi ngeke silale phandle ngoba ibandla leCCC lilomkhankaso koBulawayo okusalayo sesizwile ukuthi kusasa bafuna ukwenza udlakela ngakho sithi amapholisa kumele babophe bonke abantu abaphatheka kudlakela.”
Olwela amalungelo oluntu, uNkosazana Cora Ndebele, uthi bayayizwa inkuthazo yomsekeli kamongameli kodwa okudanisayo yikuthi kuphelela emlonyeni ngezikhathi ezinengi abebandla lakhe yibo abavame ukuqala udlakela.
Sekusele amalanga angamatshumi amabili lambili ukuba izwe liqhube ukhetho lwama by-elections. Sekube lezahlakalo zodlakela endaweni ezimbalwa ezigoqela koBulawayo, eKwekwe, Harare lezinye. Abenhlanganiso ezizimeleyo, amabandla ezombusazwe lenhlanganiso ezilwela amalungelo oluntu, ziyalusola loludlakela.
NgoMgqibelo, ibandla elibusayo eleZanu PF, lilomhlangano omkhulu eTsholotsho wokunkhankasela ukuthola usekelo kukhetho. Kuthi eliphikisayo elikhulu eleCitizens Coalition for Change, lilowalo koBulawayo nkundleni yemidlalo eWhite City Stadium.
Kusenjalo, ngoLwesihlanu engakayi emhlanganweni eSilwane Grounds ePumula, uChiwenga uke wakhokhela uhlelo lokubutha izibi emavinkilini ePumula East lapho ancome khona ikhansili yakoBulawayo ngokuhlanzeka.
Kodwa emhlanganweni womkhankaso usole ibandla eliphikisayo ethi liyehluleka ukubusa emadolobheni abawakhokhelayo.