WASHINGTON DC - Umanyano weUnited Nations (UN) uvotile izolo wapasisa isinqumo sokusola eleRussia ngokuhlasela eleUkraine, kodwa eleZimbabwe libe ngelinye lamazwe angamatshumi amathathu lanhlanu, 35, akhethe ukungavoti kumbe ukuthatha uhlangothi kuloludaba.
Amazwe avotele isinqumo lesi emhlanganweni weUN General Assembly edlula ikhulu, 141, njalo agoqela eleMelika, eleFrance eleBhilithani kanye lamanye aseAfrica afana leBotswana leZambia.
Isinqumo lesi, i-draft resolution, sixwayisa uMongameli weRussia uMnu Vladimir Putin ukuthi esuse amabutho akhe kweleUkraine ngokuphangisa.
Amazwe akhethe ukuma eceleni njengeZimbabwe agoqela eleSouth Africa, eleSudan, eleNamibia, eleIndia, leleMozambique.
Kulamazwe njalo amahlanu avote esala ukusola iRussia abalisa yona iRussia, iNorth Korea, Belarus, Syria kanye leEritrea, eyiyo yodwa ilizwe elikuzwekazi leAfrica elivote lisekela iRussia.
Intathelizindaba elandela okwenzakalayo mayelana ngalimpi uMnu Simbarashe Nembaware utshele iStudio 7 ukuthi eleZimbabwe alifuni kuthatha uhlangothi ngoba lilobudlelwano leKremlin obaqala ngesikhathi lisalwela inkululeko lapho eleRussia elaliphathisa khona ngezikhali kanye lokulolongwa amabutho alo.
Your browser doesn’t support HTML5
Ingxoxo loMnu Simbarashe Nembaware