UNkosazana Thokozani Khupe, okhokhela elinye lamacele ebandla leMDC-T, ukhuthaza amabandla aphikisayo ukuba abumbe umanyano ozalwisana lebandla leZanu PF kukhetho oluzakwenziwa ngomnyaka ozayo.
UMaKhupe wethule lokhu ngoLwesithathu ekhuluma lentathelizindaba koBulawayo ngesimo samabandla aphikisayo.
Uthe kubi kakhulu okwenziwa ngamabandla aphikisayo ngoba ukubangisana kwawo kwenza ukuba eleZanu PF libuse santando.
UMaKhupe uthe kumele amabandla amanyane ngesikhathi kulungiselelwa ukhetho oluzakwenziwa ngomnyaka ka2023.
Uthe kumele amabandla evume ukuba aphambanisana okwesikhathi eside uzulu efisa ukususa ibandla leZanu PF embusweni.
UMaKhupe ugcizelele esithi ibandla leMDC lalizanqoba kukhetho olwenziwa ngomnyaka ka2018 alubana lalibambene lamanye aphikisayo.
“Singakhangela ukhetho luka2018 eMatabeleland South, Matabeleland North lakoBulawayo kuyaveza obala ukungabambani kwamabandla. Ungakhangela koBulawayo kusukela ngo2000 ibandla leMDC labalamavoti angaphansi kwengxenye yekhulu ekhulwini. EMatabeleland North iMDC Alliance yathola amavoti ayisilinganiso sokungamatshumi amathathu lesikhombisa ekhulwini kuthi iMDC-T yathola okungaphansi kwetshumi ekhulwini i9,5 percent kuhlangene kwakusiba yi47.3 percent okutsho ukuthi ibandla leZANU-PF sasingalinqoba nge7,8 percent sihlangene. ELupane West, Nkayi South leNkayi North kuhlangene iMDC Alliance leMDC-T ivoti yabo ihlangene ibizakubankulu leyeZANU-PF ngoba ibingaba lesigaba eziyisifica minwe mibili kwalitshumi lantathu kwakhona.”
Ohlaziya ezombusazwe, uMnu. Effie Ncube, ugcizelela okukhulunywe nguMaKhuphe.
“Ijoyi kupolitiki alisebenzi, lamhlanje liyaxabana kusasa livuke lingabangane buye amabholoho kwezepolitiki awatshiswa abantu ababambisane, ukunqoba kudinga ukuba babambane ukuze banqobe kungakhathalekile ukuba bake behlukana ngemibono kumele babambane.
UMnu. Elphas Mashaba, ilunga leZANU-PF eNketa, uthi bona abalani lokwenzakala kumabandla njalo akubahluphi.
“Ukwenza kwabantu abavele bephelelwe bengaze bahlale behlangane asiboni ukuthi kuzaphumani. Thina njenge ZANU-PF Sikhangelele ukuthi kuma by-elections azayo sithathe konke. Laba ngabantu abaphelelweyo.”
Isikhulumi seCitizens Coalition for Change koBulawayo, uMnu. Swithern Chirowodza, uthi akamthembi uMaKhuphe ngenkuthazo yakhe.
“Thina koBulawayo njengebandla asikahlli phansi ukuthi sicubungule lindaba ukuze siphume lesinqumo sokubambana lamanye amabandla kodwa mina angimthembi uDr Khuphe ngoba kukhetho olwedlule wayemelana lokubambana okwadala iMDC-Alliance, ngo2017 uBaba uTswangirai wabumba ialliance yena amelana layo waze waya emthethwandaba, lamhlanje ukuthi athi amabandla abambane asimthembi.”
Uzulu uyakuncoma ukumanyana kwenkokheli yamabandla aphikisayo, ikakhulu emhlubulweni weMandebeleni ikhuthaza abalandeli ukuthi kungakhathelekile ukuthi basekela liphi ibandla lezombusazwe, okuqakathekileyo okwamanje yikuthi babhalisele ukuthola ilungelo lokuvota kanye lokuphuma ngobunengi ukuyavota ngezikhathi zokhetho.
Mhlaka 26 Mbimbitho izwe liya kukhetho libuyisela inkokheli zekhansili ledale lephalamende ezaxotshiswa ezikhundleni ngendaba zokundonselana kumabandla aphikisayo. Ngasikhathi sinye abekhomishini eqondisa ezokhetho eyeZimbabwe Electoral Commssion bephakathi kohlelo lwabo lokubhalisa abantu ukuba bathole ilungelo lokuvota,olweVoter Registration kulungiselelelwa lokubumba izigaba ezintsha zokhetho luka2023.