Emizameni yokuthuthukisa inhlalakahle yezisebenzi zakhe uhulumende uthi uzathuthukisa indlela ababalisi abaholiswa ngayo kusiya ngokuthi balesibanga siphi semfundo, idiploma, degree loba imasters.
Uhlangothi olubona ngezemali olwe Treasury lubikwa solubeke eceleni izigidi ezilikhulu lamatshumi ayisithupha zamadola eZimbabwe (ZW$160million) yokufeza lumsebenzi.
Ababalisi bakhalale umsebenzi ngokuvulwa kwezikolo mhlaka 7 Nhlolanja bethi abenelisi ukuya emsebenzini ngaphandle kokuba bethole iholo ababelithola ngomnyaka ka2018 lamadola eMelika aphezu kwamakhulu amahlanu (USD$500).
Babuyele emsebenzini ngemva kokuba umqatshi ethe ongasoze abuyele emsebenzini kufika umhlaka 22 Nhlolanja uzathathwa njengomuntu osetshiyile umsebenzi.
Isinqumo sokuguqulwa kweholo lababalisi sibikwa sivele kuMongameli Emmerson Mnangagwa njalo sikhangelelwe ukuqala ukusebenza ngayonale inyanga kaMbimbitho. Ukwengezwa kweholo kukhangelelwe ukuthuthukisa ababalisi abahlonitshwa ngokuzimiselwa kwabo kokufundisa isizwe se Zimbabwe.
Umqondisi wenhlanganiso yababalisi eye Zimbabwe Teachers Union udokotela Sifiso Ndlovu uchasisa ngesinqumo esesithethwe nguhulumende lesi.
“Inkundla yeNational Joint Negotiations Council icindezele okwaphuma kunkulumo ezedluleyo. Lapha eyafakaza khona ukuthi ekuthuthukiseni iholo lababalisi kuzakuba khona ukunanzelelwa kwababalisi abathe bazithuthukisa kwezemfundo, bazangezelelwa iholo kulandelwa isibanga abathe basifika. Okunye njalo yikuthi kuzaba khona ukuhlonipha ababalisi ngokuhamba kwesikhathi labo abangena umsebenzi kuqala bazathuthukiswa okutsho ukuthi iholo labo lizathuthukiswa kusukela ngo2012 kuze kufike khathesi.
Uqhubekela phambili uNdlovu ethi uhulumende uthembisile ukuba imali yokuthuthukisa iholo lababalisi ikhona.
"I20% leyo engezeleliweyo izabe isibuya ifakwa phezu kweholo elithuthukisiweyo kulandela ukuguquka lokho ,lokho sikwazisiwe sakuthenjiswa ngunongqongqotsho wezimali ukuthi okhona imali aseyifake eceleni ukuthi ahloniphe ananzelele ukuqheqhetsha kwababalisi kanye lesikhathi ababekiso emsebenzini.
Umnumzana Thembakuye Moyo isikhulumeli seAmalgamated Teachers Union uthi bona bafisa ukuthi iholo liqale lilungiswe andubana kuholiswe ngezicoco.
“Sithanda ukumbonga uhulumende nxa ekhuluma indaba enjalo kodwa okubalulekileyo ayisikho ku upgrader, sifuna ukuthi njenge ARTUZ basinike ibasic salary eqondileyo ngoba nxa upgrader ngikuzero ungisangaphi but nxa engaqala ngebasic salary ka2018 ye540US sesingaqala ukukhuluma ngeseniority.Kubalulekile ukuthi abantu bakuzwisise khonokho ngoba okukhona khathesi umbalisi ole25years uhola njengombalisi ole2years ehola imali esikhala ngayo.Ngoba siphiwa 540US besivele sikhala ngakho ukuthi ababalisi bengaphiwa imali efanayo.
Umnunzana Raymond Majongwe unobhala wenhlanganiso ye Progressive Teachers Union of Zimbabwe uthi bazajabulela ukwengezwa kweholo labo nxa sekufeziwe ngumqhatshi.
“Uhulumende uma efuna ukusitshela ukuthi kukhona asekwenzile, kafake isilinganiso seholo lethu. Sibone ukuthi ukhuluma ngani, ngoba sizajabula kanti ufaka i $20RTGS athi yena yimali yokunanzelela laba sebesebenze isikhathi eside. Lokhu kakube yisinqumo uhulumende azimusele ngaso. Okwakhathesi asiyi kujabula singakaboni ukuthi uhulumende ukhuluma ngani.”
Imizamo yokuxhumana lomphathintambo wogatsha olukhangele izisebenzi zikahulumende uSikhwicamfundo Paul Mavima yehlule ngoba ucingo lwakhe belungangeni. Kodwa ekhuluma labephephandaba leChronicle uchaze ukuba kusukela ngalinyanga kaMbimbitho uhulumende sezaholisa ababalisi ekhangela iminyaka umbalisi aseyisebenzile lokhu kuzathuthukisa labo asebesenze iminyaka eminengi njalo kukhangelwe lalabo ababaqeqetshe ngokuphezulu labo bazaholiswa ngesilinganiso esiphezulu.
Ugcizelele ngokuthi ulesiqiniseko sokuthi ugatsha olukhangele ngezemali luzafaka amadolaeZimbabwe ayizigidi ezilikhulu lamatshumi ayisithupha ($160 million) yokufeza lumsebenzi. Kodwa uthi ubona engani uhlelo lolu luzadinga imali ephezulu kwaleyo efakwe nguhulumende njalo ulethemba lokuthi njengoba uhulumende etshengise ukuzimiselaukuthuthukisa iholo lezisebenzi zakhe ngalesi sinqumo esitsha, uzakwengeza eyinye imali phezulu kwaleyo aseyithembisile.
Your browser doesn’t support HTML5
Udaba lwesivumelwano seholo lababalisi lomqatshi siluphiwa nguBathabile Masuku