Ibandla leCitizens Coalition for Change (CCC), elikhokhelwa nguMnu. Nelson Chamisa, lithi umlandeli webandla leli ubulewe ngeSonto ngabacatshangelwa ukuba ngabalandeli bebandla leZanu PF kulandela ukuhlaselwa kwabo eKwekwe ngesikhathi belalele umkhokheli wabo ekhuluma ngokhetho lwama by-elections oluzayo.
Isikhulumeli samapholisa uSenior Assistant Commissioner Paul Nyathi walile ukukhuluma ngodaba lolu esithi usendaweni elomsindo.
Kodwa uNkosazana Fadzayi Mahere, isikhulumeli sebandla leCCC, wethule umbiko ebulenjini bokuxhumana obeTwitter esithi basakhulumisana lezihlobo zikamuyi ngokubulawa kwakhe kulandela udlakela emhlanganweni webandla leli oludalwe ngabacatshengelwa ukuba ngabalandeli bebandla elibusayo.
UMahere uthe abedlula amatshumi amabili - 22 bahanjiswe esibhedlela.
UMahere uthe kuyabakhathaza ukuba ibandla leCCC livinjwa ngamapholisa labanye abezomvikela indawo zonke ukuba likhankase ngokuthula.
Abahlasele abalandeli bebandla leCCC benze lokhu uChamisa ekhuluma labalandeli bakhe.
UChamisa ucele abalandeli bakhe ukuba bengasuki emhlanganweni lo ngesikhathi behlaselwa.
UNkosikazi Sinikiwe Mabhena, obesemhlanganweni lo, utshele iStudio 7 ukuthi bebelalele uChamisa bengakahlaselwa ngabacatshangelwa ukuba ngabalandeli bebandla leZanu PF.
Kodwa uMnu. Mabutho Moyo, okubandla elibusayo, uthi ngamanga aluhlaza tshoko ukuba lokhu kwenziwe ngabalandeli bebandla leZanu PF.
UMnu. Joseph Tshuma, owake wamela iPelandaba Mpopoma edale lephalamende, uthi kumele abantu bekhankase ngokuthula.
Kuyaxokozela eZimbabwe ngesikhathi kudingwa abazamela amakhansili lezigaba ezitshiyeneyo kudale lephalamende okulamalunga axotshiswa libandla leMDC-T lele People’s Democratic Party.