Ingcwethi ezibona ngobudlelwano bamazwe womhlaba lezombusazwe zithi ukuhlaselwa kwele Ukraine ngele Russia kulakho ukuphazamisa kakhulu umnotho wakwlele Zimbabwe.
Lokhu kuza ngemva kokuba amaviyo ebutho laphansi awolwandle lawe moyeni aweAir Force akwele Russia eqale ukuhlasela eleUkraine empondozankomo ngoLwesine.
UMongameli Volodymyr Zelensky wakwele Ukraine utshele izizalwane zalelolizwe ukuthi abafisa ukuzivikela bakhululeke ukuzothatha imibhobho bancedise ukulwisana lele Russia. Ngakwelinye icele uMongameli Vladmir Putin wakwele Russia, uthi amanye amazwe azake alokothe angenele kule impi azawahlasela lawo.
Inhlanganiso zezindaba ezehlukeneyo zomhlaba zibika ukuba indizamtshina zonke ezingasizo zebutho sezimisiwe ukungena loba ukuphuma kwele Ukraine. Abantu labo sebeqalile ukubaleka emizini yabo ngemva kokuhlasela okwenziwa ngele Russia. Abebutho lakweleUkraine babikwa ukuba sewise indizamtshina ezine zebutho lakwele Russia, kodwa okulandulwa ngabeRussia.
Selokhe impi phakathi yamazwe la yaqalayo eleRussia lisethusela ukuthatha lesi sinqumo intengo yamafutha ezimotha ihle yakhuphuka emhlabeni jikelele ngoba amazwe emba amafutha la asethengisa amalutshwane.
Ingcitshi ezicubungula ezomnotho zithi lokhu kuzadala umonakalo ngakhoke ele Zimbabwe kumele lilungele ukubhekana lobunzima bokuswelakala kwamafutha ezimotha.
Enye yalezi ngcitshi nguMnu. Ntando Ndlovu ochasisa kabanzi ngalokhu.
“Impi le sizakuzwa impumela yayo ngoba kuzakua lokukhwela kwamafutha ezimota. Sesibone intengo yamafutha ikhwela kakhulu. Kumele kuqiniswe izijeziso zomnotho kwele Russia.”
Okungumcabango ogcizelelwe ngenye njalo ingcitshi ecubungula ezomnotho uMnu. Nkosana Dlamini.
“Ele Zimbabwe lizaphazamiswa ngoba imali ekhona enceda abantu ingacina isisiwa kwele Ukraine. Singakhangela njalo ukuthi impi ehlanganisa ilizwe le Russia ilakho ukuqala impi yomhlaba.”
UMnu. Pride Mkono yena ocubungula ezombusazwe lobudlelwano bamazwe womhlaba uthi okwenzakala e Ukraine kuzadala umonakalo hatshi emhlubulweni lowo kuphela kodwa lasemhlabeni jikelele.
“Kuzakwenza ukuba ukutholakala kwe nqoloyi kube nzima. Intengo yesinkwa izakuya phezulu. Amafutha ezimota besiwathola ngcono. Intengo yamafutha ezimota izakuya phezulu.”
Uhulumende weZimbabwe uthi uzakwethula umbiko ophathelane lokuhlaselwa kwele Ukraine kusikhatshana esifitshane esilandelayo. Imizamo yokuthola imbono yomphathintambo wezobudlelwano be Zimbabwe lamanye amazwe womhlaba uMnu. Fredrick Shava yehlule.
Intengo yamafutha ezimotha ibe isifika kukhulu lamadola eMelika-US$100 ku-barrel, okuyintengo ephezulu kakhulu phakathi kweminyaka eyisikhombisa esanda kwedlula.
Lokhu kutsho ukuba eleZimbabwe lingaba lentengo ephezulu yama futha ngesikhathi uhulumende evele ethatha imali yemithelo kuloluhlangothi.
EleRussia leleUkraine alima inqoloyi efika isilinganiso samatshumi amane ekhulwini 40% ethengwa ngamazwe womhlaba.
Ele Zimbabwe ngelinye lamazwe athenga inqoloyi kwele Ukraine esetshenziswa ukupheka isinkwa ukuze ihlanganiswe laleyo elinywa elizweni ngakhoke nxa impi ingaqhubeka okwesikhathi eside kutsho ukuba ilizwe lizabhekana lobunzima.