Abafundisa ezikolo zemfundo yaphezulu ezigoqela eseGreat Zimbabwe University eMasvingo lese University of Zimbabwe eHarare kanye lebanye abaqhuba eminye imisebenzi engasi yokufundisa, bakhala ngokuthi kabasanelisi ukuya emsebenzini ngoba imali abayiholayo kayeneli indleko zabo.
Ingcwethi kwezokulwela ilungelo lezisebenzi zithi lesi sehlakalo silakho ukuphazamisa ukumakwa kwemihloliso esanda kubhalwa yizifundi kanye lokuvulwa kwesigaba sakuqala somnyaka.
Lokhu kukhalaza kwabafundisa emakolitshino ezemfundo yaphezulu elizweni kuza ngesikhathi ababalisi besehluleka ukubuyela lapho abasebenza khona ngasikhalazo esifanayo.
Encwadini yabafundisa kwesinye salezi zikolo i-University of Zimbabwe ibhalelwe umkhokheli wekolitshi le njalo yasayinwa yinkokheli yeAssociation of University Teachers, University Technicians' Association kanye labenhlanganiso emela izisebenzi ekolotshini Ieli mhlaka 20 Nhlolanja, iveze ukuba abasenelisi ukugcwalisa indingeko zabo ngenxa yeholo eliphansi kakhulu osekubangela ukuthi behluleke ukuyafundisa njengalokho abakukhangelelweyo.
Kubikwa ohola imali encane kulabanye bonke ngothola ZW$21,000 okuyimali esilelayo kakhulu ma kukhangelwa indleko zabo.
Omunye wabasayine lingcwadi, uDokotela Wilbert Zvakanyanya Sadomba, umgcinisihlalo kunhlanganiso yabafundisa kulesi sikolo yeAssociation of University Teachers, walile ukukhulumisana lentathelizinda wathumela umbiko ngendlela yokukhulumisana yebulenjini ye WhatsApp esithi akafuni yena ukukhuluma ngalolodaba.
Okhokhela uhlangothi lwabafundisa eGreat Zimbabwe University, uMnu. Givewell Munyaradzi, uthi kunengi abakusolayo.
“Okusenze sathatha lelinyathelo kuyingoba iholo esesilithola lingasaneli, liphansi kakhulu kulelo elibethwa phansi kwe PDL. Sekumele ikhuphulwe imali esiyithulayo njalo sikhangelele ukuba umqhatshi uzokwenza lokho ngokuphangisa. Kuhambelana lalokho okwavumelanwa phansi kwenhlanganiso ye SADC, i SADC benchmark. Kunje u-Grade 6 Lecturer uhola imali engage USD$350 - 00 ikanti abanye abakusibanga sinye esigabeni betholiswa engaba kuUSD$4 000-00.”
Lokhu kusekelwa ngokhokhela uhlangothi labaqhuba eminye imisebenzi engasi yokufundisa khona e GZU, uMnu. Jabulani Denhere.
“Iqiniso ngelokuthi lelinyathelo elithethweyo, libangelwe yikwehla kweholo elingasaneli ndleko zethu zansuku zonke. Umzekeliso, okusigaba saphansi uthola imali encane kakhulu engange ZW$16 000 okuyimali encane kakhulu njalo kungokwabangelwa yikwenza komqhtshi ngoMfumfu ngomnyaka ka 2020 lapho ehlukanisa izisebenzi kakhulu edabeni lwezeholo.”
Isikhulumeli enhlanganisweni yababalisi abafundisa emaphandleni yeAmalgamated Rural Teachers Union of Zimbabwe, uMnu. Thembakuye Moyo, uthi kungamangalisi lokho okwenzakalayo, lapho abafundisa emaUniversity sebekhala labo ukuthi kabasanelisi labo ukuqhuba umsebenzi ngoba imali abayiholayo inganeli indleko zabo, kuyisibonelo sokuba izisebenzi zonke zikahulumende, zilambile.
“Yena kodwa uhulumende ukutshaya indiva. Akubona kungcono yikuthi abe lokhe esethusela ngokuthi uzaxotsha abantu umsebenzi, esethusela ngokusibopha, esethusela ngokusitshaya. Kanti amandla uwathola ngaphi uhulumende wokwenza lokhu.”
Unobhala jikelele enhlanganisweni elwela ilungelo lezisebenzi yeZimbabwe Congress of Trade Unions, uMnu. Japhet Moyo, uthi ukwehluleka kwezisebenzi zonke jikelele ukuya emisebenzini ngoba imali ezitholwa yizo inganeli, sokubhahile kakhulu kulezi insuku ilizwe lonke.
Lokhu uMoyo uthi kuzaphazamisa uhlangothi lwezemfundo lokubuyisela muva umnotho welizwe.
“Kuzabulala imfundo yabantwana nxa abantwana bengasoze bathole ababalisi, nxa kungasalungisiswanga lokho. Laku production side akusoze kusimangalise ukubona ke sesithola ama-products aphuma kwamanye amazwe , esingathi ngama imports, ngokuthi ama comapanies aphakathi kwelizwe izisebenzi ziyabe zingakwanisi ukuya emsebenzini, sekuyakwehlisa ke i-production. ”
UMnu. Victor Dube, ohlala eHarare ongumzali laye olabantwana abafunda kumakolitshi emfundo yaphezulu, uthi kuyamkhathaza kakhulu lokho osekusenzakala.
“Okukhona khathesi yikuthi sibone, sihlale phansi sibonisane ukuthi empilweni singaphila njani. Labo esingathi ngama Industrialist, abakhweza izinto lapha labo behlale phansi labantu abathengayo ukubonisana ukuthi bengahlangana ngaphi ngoba iholo labantu selililutshwana kakhulu. ”
Asisanelisanga ukuthola umbono ovelela kuhulumende phezu kwaloludaba njengoba umphathintambo wogatsha lwezemfundo yaphezulu uProffessor Amon Murwira ebe ngaludobhi ucingo lwakhe njalo engaphenduli lemilayezo ayithunyelwayo ngendlela yetext.