UMongameli Emmerson Mnangagwa lomunye wakhe wakwele Botswana, uMnu. Mokgweetsi Masisi, bakhangelelwe ukuba khona emhlanganweni wokuqinisa ubudlelwano bamazwe womabili eVictoria Falls ngoLwesihlanu.
Lumhlangano ukhangelelwe ukuphatha indaba ezithile ezigoqela ukusebenza komngcele wePlumtree, ukuhlaziya udaba lokuntshontshwa kwezifuyo emngceleni, kanye lodaba lwabeqa umngcele okungekho emthethweni.
Iziphathamandla zeZimbabwe leBotswana zihlangana mnyaka yonke ukuhlaziya indaba ezitsheyeneyo eziphathelane lamazwi womabili.
Owalonyaka, wona oqale eVictoria Falls ngoMvulo, uhlaziya ukulotshwa kwezivumelwano ezitshiyeneyo okwenziwa ngamazwe womabili nyakenye.Umongameli Mnangagwa kanye lomongameli Masisi bakhangelelwe ukufika eVictoria Falls ngoLesihlanu ukuzongena lumhlangano.
Umbiko okhitshwe nguhulumende weBotswana uthi umhlangano lo uqhakathekile ekuqiniseni ubudlelwano phakathi kwamazwe la angomakhelwane.
Indaba ezisetafuleni zigoqela ukuvulwa komngcele owodwa phakathi kwePlumtree leRamokgwebana, kuyindlela yokuzama ukwenza inhambo phakathi kwamazwe womabili zibelula.
AbeZimbabwe kweleBotswana abafana lomnunzana Stanley Ncube bathi leli kungaba linyathela elihle.
“Umhlangano lo oweBi National Commission ozaletha omongameli sizacela ukuthi basheshise isivumelwano se One Post Border Post njengoba kwake kwakhulunywa ngomnyaka odlule
UMnu. Andreas Sibanda laye uyavuma esithi lokhu kungehlisa ukuminyana emngceleni lo.
“Umngcele wePlumtree le Ramokgwebana uhlala uphithizela, ngakho kuyamukeleka ukuthi ohulumende bobabili sebekubone kufanele ukuthi bayenze iOne Stop Border Post. Lokhu kuzakwenza kubelula ukuhamba kwabantu hatshi ukuthi uthole kuphithizela ikakhulu ngesikhathi sekhefu kungahambeki kuhle.”
Olunye udaba abeZimbabwe kweleBotswana abafisa lukhangelisiswe luphathelane leziqondiso zeCovid-19.
Ngeviki edluleyo eleBotswana libike ukuthi lizavumela abahlatshwe ijekiseni yeCovid-19 ngokupheleleyo ukuthi bengene elizweni kungela sidingo sokuthi betshengise impumela yokuthi abalagciwane leli.
Kodwa eleBotswana lithi abangahlatshwanga kumbe asebethole ijekiseni eyodwa, kuzamele behlatshwe mahala uma bengena emngceleni.
Ngakwelinye icele eleZimbabwe lilokhe lisithi abantu, noma bahlatshiwe kumbe hatshi, kumele batshengise impumela yokuthi abala mkhuhlane weCovid-19 andubana bengene elizweni.
UNcube uthi lokhu kumele kulungisiswe ngamazwe womabili.
“Sikhangelele ukuthi bafake imthetho, kumbe bathathe isinqumo sokulwisa iCovid bendawonye. Lapho sikhuluma ngeziqondiso zokuchapha imngcele phakathi kwamazwe womabili. Kumele imithetho ibe yinto yinye, njalo kungasiduleli uma sisiyachapha. Njalo kulendaba yokuntshontshwa kwezifuyo emngceleni okumele inkokheli ikhulumisane ngalo.”
Phezu kodaba lokuntshontshwa kwenkomo emzini eseduze lemngcele, eleBotswana laphawula ikomishini ukuthi ithaphe imbono yezakhamizi phezu kwaloludaba.
Abalimi beBotswana bakhala ngokuthi bantshotshelwa inkomo ngabantu abeqa umngcele bevela eZimbabwe.
Umhlangano phakathi kweziphathamandla zamazwe womabili uzagqitshwa ngoLwesihlanu.