Lize lenelisa ukulitshayela emambuleni iqembu lomdlalo wenguqu ele Highlanders emdlalweni walo owesine kusigaba se Premier Soccer League.
Iqembu le Highlanders linqobe okwakuqala kumidlalo yeligi lapho litshaya ele Whawha nge 2 ka nya ngeSonto enkundleni ye Barbourfields.
Loba nje iqembu le Bosso linqobile, abalandeli balo basele belokhu bekhathazekile ngoba likhuthe amathuba amanengi awokuhlohla.
Umqeqetshi uMandla Mpofu uthi kumele abagadli bakhe befake amaphaphu phansi nxa sebekhangelane legedi.
“Besimadolo nzima phambilini komdlalo ngoba ukhumbule kasiqalisanga kuhle imidlalo yalonyaka yikho ngiyajabula ngokuthola imiklomelo emithathu.
Abagadli ngilokhu ngisabakholwa loba bekhuthile. Indaba isekutheni kumele bazithembe njalo bengatatazeli kodwa mina njengomqeqetshi kuyangijabulisa ukuba bayawathola amathuba njalo kuzamele sizame ukulungisisa ukuze siwasebenzise,” kutsho uMpofu.
Umdlali wesiswini senkundla uNqobizitha Masuku nguye olitshayele emambuleni kabili.
Limpumela itsho ukuba iqembu le Highlanders lize lenelisa ukuhlohla emdlalweni walo wesine ngemva kokuba linqotshwe nge 2 ka nya ngele Black Rhinos, laba ngutshiki lobhanqa 0 ka 0 lele Ngezi Platinum, lanqotshwa ngele Manica Diamonds 1 ka nya kumidlalo yalo emithathu elandelwe ngowangeSonto edluleyo.
Umqeqetshi weqembu le Whawha uLuke Petros Jukulile uthi abafana bakhe kabayangisanga loba benqotshwe liqembu le Highlanders.
“Ungakhangela lapho esivela khona ngibona angani kulengqubela phambili nxa ukhangela inani lamagoli abasidle ngawo lokuthi iqembu le Highlanders liqembu elikhulu kanjani,” kutsho uJukulile.
NgoMgqibelo iqembu le Chicken Inn litshaye ele Bulawayo Chiefs nge 2 ka 1 emdlalweni obuse Luveve njalo bekungokwakuqala ukuba iqembu le Chiefs linqotshwe kumidlalo yeligi.
Umsekeli kamqeqetshu weqembu le Chicken Inn uPrince Matore uthi basizwe yikuba baqhuba kuhle amalungiselelo ngemva kokuhlaba ikhefu ekuqaleni komnyaka.
“Kutshengisa ukuba amalungiselelo ethu awe pre – season ahambe kuhle njalo sizayala silokhu sisebenza kanzima ukuze sibe silokhu sithola imiklomelo,” kutsho uMatore.
Eminye imidlalo edlalwe kuviki yesine eyemidlalo ye Premier Soccer League iphele ngokulandelayo;
NgoMgqibelo iqembu le FC Platinum libe ngutshiki lobhanqa lele Dynamos 0 ka 0 kuthi ele Yadah libe ngutshiki lobhanqa lele Black Rhinos 0 ka 0.
NgeSonto ele Herentals litshaye ele Manica Diamonds nge 2 ka 1, iCranborne Bullets le ZPC Kariba zibe ngutshiki lobhanqa 0 ka 0, iTriangle United le Harare City lazo zibe ngutshiki lobhanqa 0 ka 0 kuthi ele Tenax linqobe ele Bulawayo City nge 2 ka nya.
Umdlalo odlalwe namhla phakathi kweqembu le Caps United lele Ngezi Platinum Stars uphele lawo ungutshiki lobhanqa 0 ka 0.
Your browser doesn’t support HTML5
Ezemidlalo siloJoseph Njanji