Ingcwethi ezicubungula ezombusazwe zithi akumelanga kubelodlakela eZimbabwe ngesikhathi sokhetho. Bayakhankasa ngamandla abazancintisa kukhetho oluzayo.
Ingcwethi zombusazwe zethule lokhu kulandela imibiko ethi kulabanye abantu abahlasele abakubandla leCitizens Coalition for Change labanye njalo abakubandla elibusayo eleZanu PF. UMongameli Emmerson Mnangagwa ngeviki ephelileyo ukhuthaze abalandeli bamabandla ezombusazwe ukuba bekhankase ngokuthula ngesikhathi ilizwe lilungiselela ukhetho lwama by-elections oluzakwenziwa ngenyanga ezayo. Omunye wabasola abadala udlakela nguMnu. Effie Dlela Ncube.
“Ungakhangela uSection 67 weConstitution opha abantu ilungelo lokuthi bangene kulamaqembu baphume bangene kulawana bekhankase bengavinjelwanga, bazikhethele labo abafuna ukuthi babe ngabaholi babo, uKhansila, uMP, uSenator, uPresident, bengavinjelwanga njalo bengazange bethuselwe. Kanti ke uSection 58 weConstitution ubapha ilungelo abantu ukuthi bangene kumaqembu abafuna ukuwabumba bengazange bavinjelwe, bengazange bethuselwe.”
UNcube uthi abantu akumelanga bekhahlanyezwe ngesikhathi sokhetho.
“Kufanele bantu bakhankase bengavinjelwanga, bengazange bethuselwa, bengazange batshaywa, bekhankase kuma televisons, bakhankase emaradiyweni bazibambele imihlangano, ama-rally lakho konke bengazange bavinjelwa, yiyo i-Democracy leyo. Hayi isiyaluyalu sokutshayana sokwethuselana lesi esisisbonayo, ayisiso ezihambisana leDemocracy, senza ukhetho lungakhululeki.”
UMnu. Mlindelwa Mancitshana, laye oyingcwethi kwezombusazwe, uyakusekela lokhu.
“Njengoba betsho ukuthi nxa isisifa iyaqhatsha, sekuyikuphela kwensuku zakhona, bayazizwa lakho ukuthi hayi, lapha sesikhamekile. Basazama nje ukuthi bathi … kodwa sekuzinsuku zabo zokucina, kungasimangalisi kakhulu lokho abakwenzayo abadala ngoba izinsuku zabo sezimbalwa ngalesi sikhathi lapho esibona khona umuntu wonke esefuna ukuthi alubana izinto zingaguquka, sibone elinye icele elitshaleli ukuthi lona lisiphatheleni.”
Eyinye njalo ingcwethi kwezombusazwe, uNkosikazi Abigail Mupambi, okunhlanganiso ye#ThisConstitution, uvumelana laye.
“Like any other year, sekuqalisile i-violence, i-hate speech, intolerance, toxicity, abantu bayaxabana. Usumangala ukuthi kanti manje i-Democracy yona leyo eliyifunayo, lifuna ukuthi yenziwe ngoba ma lina lingayilandeli njengabomongameli, lingayilandeli njengamabandla aphikisayo, lingayilandeli njenge Ruling Party manje izalandelwa ngubani leyo Democracy?. So uzabona ukuthi hayi, silomsebenzi lapha sibili, akusincedi, this time around we are just seeing the usual and this is against Democracy yankhona.”
UMnu. Elifasi Mashaba, okubandla leZanu PF, uthi kumele abantu bonke bekhankase ngokuthula.
Ukhetho lwama by-elections luqhutshwa ngesikhathi selehlile inani labantu ababanjwa ngumkhuhlane weCOVID-19 eZimbabwe. Umkhuhlane lo usubulele abafika phose inkulungwane ezinhlanu lengxenye – 5,386 elizweni kusukela ngomnyaka ka2020.