Owayengumsekeli kamongameli wakwele Zimbabwe, uMnu. Kembo Mohadi, uthi abantu kumele bevote ngobunengi babo kukhetho lwama by-elections oluzakwenziwa ngenyanga ezayo.
Ekhuluma emhlanganweni wokusungula umkhankaso webandla leli koBulawayo ngoLwesihlanu, uMohadi uthe kulilungelo lomuntu wonke ukuba avote kukhetho.
"Ngiyabonga Bulawayo omuhle ngicela lisekele uNdlovu loNsingo ukuze banqobe kukhetho oluzayo. Engikucelayo yikuthi liyebhalisela ukuvota livote njalo ngoba akusizi ukuza lizogcwala emhlanganweni lingayivota. Lingavota kuzakwenza ukuba siphutshe lokho esikuhlelileyo njengebandla njalo lolukhetho luzakubayisibonelo sokulungiselela ukhetho luka 2023."
Zanu PF Supporters Attending A By-election Rally in Zimbabwe
Umgcinisihlalo weZanu-PF koBulawayo, uMnu. Jabulani Sibanda, ukhuthaze abantu ukuba behlukane lodlakela ngales’isikhathi somkhankaso.
"Udlakela asihambisani labo njalo siyacela ukuba abantu bangaphatheki kukho kuthi inkokheli ezaziyo labo abasanda kuphatheka kudlakela kumele basazise ukuthi ngobani uma bengazi kodwa labo abakwenzayo kumele bakwekele ngoba akukho kahle ngalesi isikhathi sokhetho."
Induna uDumisani Ndondo, obesemhlanganaweni lo, ukhuthaze ukuthula lenhlonipho ezweni.
"Thina sifuna ukuthula ezweni njalo lokuhloniphana abantu bahloniphe ubukhokheli obukhona manje. Siyakhuthaza abantu kuba bayebhalisela ukuvota bavote lobanje eminyakeni edlule bebelokudonda abantu kodwa kunsuku ezidlule sikesabalemihlangano sikhuthaza abantu ukuba bayebhalisela ukuvota."
UNkosazana Bridget Bhebhe, osakhulayo weZANU-PF, uthe sewabhalisa kudala ngakho-ke ukhuthaza abatsha ukuba bephatheke kukhetho.
Abanye abantu abahambe emhlanganweni wokusungula umkhankaso webandla leZanu PF. (VOA)
"Mina ngileminyaka engu40 kudala ngabhalisela ukuvota okwamanje ngikhuthaza abasakhulayo abenelisa iminyaka engu-18 ukuba beyebhalisela ukuvota njalo bavote ngoba akukho ongakwenza loba kuyibhizimusi ephumelelayo ungazange uyevota ukuze kusebenzeke kahle."
Kukhetho lwama by-election luka mhlaka 26 Mbimbitho, iZANU PF izamelwa nguMnu. David Ndlovu eNkulumane kuthi uMnu. Gedion Nsingo, uzangqikilana labanye ePumula.
Kulabantu abanengi abanengi abakumabandla atshiyeneyo abancintisa kukhetho lolu eNkulumane, Pumula lezinye indawo.
Kulandela ukuqhamuka kobhubhane lweCovid-19 umgcinisihlalo wekhomishini ebona ngezokhetho-iZimbabwe Electoral Commission, uNkosikazi Priscilla Chigumba NgoLwezi 2020 wamisa ukuqhutshwa kwama by-elections esithi umkhuhlane lo wawulakho ukumenetheka ngamandla ngesikhathi abantu bevota.