UMongameli Emmerson Mnangagwa uthi imizamo yeZimbabwe yokuvuselela ubudlelwano bayo lamazwe omhlaba iyaphumelela.
UMnangagwa ulobe alazwi la enkundleni yeTwitter eseBrussels kweleBelgium izolo emhlanganweni weAU-EU summit osungulwe izolo njalo ophela namuhla.
EleZimbabwe selilesikhathi lizama ukuvuselela ubudlelwano balo lamazwe afakela amalunga eZanu PF izijeziso zenotho agoqela akumanyano weEuropean Union leleMelika.
Amazwe la afaka izijeziso lezi esethesa uhulumende weZanu PF umlandu wokwephula amalungelo oluntu.
UMnangagwa ufake umfanekiso wakhe kuTwitter elomholi weleFrance uMnu Emmanuel Macron leziphathamandla zeEuropean Union, ebabonga ngokumamukela kulumhlangano.
Sixoxe lohlaziya ezombusazwe uMnu Mbuso Fuzwayo sambuza ukuthi ngempela buyakhanya yini ubufakazi bokuncibilika kobudlelwano phakathi kweZimbabwe lamazwe angetshonalanga.