Ibandla leCitizens Coalition for Change (CCC) elikhokhelwa ngu Mnu Nelson Chamisa selethese ikhomishini ebona ngezokhetho eye Zimbabwe Electoral Commission umlandu wokufuna ukuqila kukhetho lwama by elections, ngokususa amabizo abantu abazavota endaweni abavotela kizo besiwa kwezinye indawo. UMlondolozi Ndlovu usethulela loludaba ngokugcweleyo.
Lokhu kuphume emhlanganweni abaleli bandla abawenze lentathelizindaba oqhutshelwe e Harare, namhlanje.
Isiphathamandla seCCC, uNkosikazi Ellen Shiriyedenga uthi njengebandla sebethole ubufakazi bokuba IZEC ifuna ukuphazamisa ukhetho lwamaBy-Elections.
“Izinto ezithize esikhala ngazo ikakhulu nxa sikhangela indaba ye voters roll. Kulabantu abakade be vota kwezinye indawo kukhetho luka 2018, basusiwe basiwa kwezinye indawo bengatshelwanga”
Uqhubeke esithi umumo oselizweni unzima kakhulu kubandla lakhe ngoba lalabo ababhalisa ukuthi bancintise kukhetho lwama by-election okumele batholiswe ithuba lokuthi bakhankase, bayahlukunyezwa.
“Kulodaba lokuthi labo siding ukhetho akukho lula njengebandla kule nkokheli zethu ezibotshwayo lokwethuselwa. Lokhu sikubona kusenzakala ku baba uTendai Biti le Organising wethu”
Umsekeli we sikhulumeli se CCC uMnu Gift Ostallos Siziba uthi njenge bandla okusalayo yikuthi bazabanjwa ngamandla ukutshengisela lokuya emithethwandaba.
“Okokuqala yikuthi sisakhuluma labe ZEC ukuthi sibone ukuthi senze njani. Okwesibili sizakuya emadale nxa singazwani. Okwesithathu sizasebenzisa ilungelo lethu lokutshengisela ukuthi sitshengise ukuba ukhetho lokhululeke”
Kodwa isikhulumeli seZEC uNkosikazi Letias Kazembe uthe ikhomishini yakhe ingabe ibe lamaphutha lapha lalaphaya okuyinto etholakalayo ebantwini.
“Singaqilelani ukhetho mntanami? Sisebenzisa i BVR. Abantu bayadinga ama voti. Kabadinge ama voti. Singaqila ukuthi kube njani? Amaphutha ayenzeka kodwa ukuthi ngithi singaqila abantu ngamanga”
Eminyakeni ngazo izikhathi kuqhutshwa ukhetho elizweni inhlanganiso ezisebenzisana lozulu ezibona ngamalungelo oluntu zivame ukusola IZEC ngokuphathisa ibandla elibusayo ukuthi liqile kuthetho kodwa yona ithi yenza umsebenzi wayo okusemthethweni.