WASHINGTON - Lanxa usibalukhulu weReserve Bank of Zimbabwe (RBZ) uMnu John Mangudya ekhuphule imali engathathwa ngumuntu ebhanga ngeviki isuka kunkulungwane ezimbili, Z$2,000, isiya kwezinhlanu, Z$5,000, uzulu uthi lokhu akusizi ngalutho ngoba ilokhe ingeneli lutho limali.
UMangudya ukhweze limali ngeviki edluleyo kodwa abanengi bathi incane ngoba indleko zansuku zonke ziqhubeka ziphezulu.
“Uhlupho esilalo kakhulu lapha yi-devaluation yemali yakithi. Yona iZ$5,000 ayisathengi lutho olungakusiza okuya ngaphi,” kutsho usomabhizimusi oyisiphathamandla senhlanganiso yabaphila ngokuzisebenza, iBulawayo Vendors and Traders Association, uMnu Aleck Ndlovu.
Ukuvulwa kwezikolo lakho kutshiye abazali abanengi bethwele nzima ngemva kokuthengela abantwana indingeko lokuhlawula ama-school fees.
“Intengo yezinto inzima kakhulu, abantu bathwele nzima. Akulanto engakhwelanga; kukhwele yonk’into ama-uniform, amabhuku, ukudla, konke kukhwelile,” kutsho isiphathamandla senhlanganiso yeNational Consumer Rights Association uMnu Effie Dlela Ncube.
Abanye bathi ukuze kube lobubelo, kumele umuntu avunyelwe ukuthatha iZ$5,000 ngelanga hatshi ngeviki ukuze abantu babe lemali ezandleni ehambelana lokudula kwezinto.
Lanxa ezinye ingcwethi zisithi ikhambi lokulungisisa umnotho weZimbabwe yikwesulwa kwemali yalelilizwe kusetshenziswe eyeMelika njengalokhu okwenzakale ngo2009, uhulumende uthi lokho akusoze kwenzeke ngoba imali yeMelika ibulala umnotho.
UMongameli Emmerson Mnangagwa ukugcizelele lokhu izolo esithi uhulumende kasoze ahlawule izisebenzi zakhe ngemali yeMelika njengalokhu okugqugquzelwa ngababalisi abaphakathi kokukhalala umsebenzi.
Your browser doesn’t support HTML5
Udaba Siluphiwa nguNtungamili Nkomo