Isiphenduka imidlalo yenguqu eyesigaba seCastle Lager Premier Soccer League kulimpelaviki ngemva kokudedela umncintiswano weAfrica Cup of Nations.
NgeSonto kulomdlalo ogobhozisa amathe ozakuba phakathi kweqembu leBulawayo Chiefs kanye lele FC Platinum enkundleni yeLuveve.
Iqembu leChiefs lingene emkambo lathenga abadlali abambalwa njalo umqeqetshi walo uNilson Terroso uthi ukudlala leqembu okuyilo eliphethe isicoco seligi kuzabapha ithuba lokuba bebone ukuba sebeqine kangakanani.
“Lumdlalo ngumhloliso omkhulu kithi njalo uzasenza sizibone ukuba sikuzinga liphi lokuthi kuyini okumele sikwenze ukuba sithuthuke njengeqembu.”
Abanye babadlali abathengwe liqembu leBulawayo Chiefs ngabakade bedlalela iqembu leFC Platinum eminyakeni eyedluleyo njalo omunye wabo ngumdlali obeyingxenye yeqembu labesilisa elimela isizwe elama Warriors uKelvin Madzongwe.
“Hayi sengiphendukile ngapha sekusekhaya manje. Ngiyajabula ukuba ngomunye wabadlali beqembu le Bulawayo Chiefs. Umnyaka lowu sikhangelele ukuthi lathi sizakwenza kuhle. Ngiyathembisa ukuthi impumela izakuba ngenhle kakhulu njalo lasengalaneni yemiklomelo sizabe siphezulu.”
Abanye babadlali asebekuqembu leChiefs abake badlalela iqembu leFC Platinum ngababalisa uPerfect Chikwende kanye lamawele akoMoyo uKelvin loElvis.
Imidlalo yona iqala ngoMgqibelo lapho iqembu leChicken Inn elizemukela khona eleTenax enkundleni yeLuveve.
Umqeqetshi weqembu leChicken Inn uJoey Antipas uthi yena bazazama ngamandla wonke ukuba bathole yomithathu imiklomelo.
“Kuqakathekile ukuqala umnyaka kuhle ngokunqoba. Yikho sizakulwa kanzima ukuba sithole imiklomelo yomithathu. Asikho ukuthi sikhangelela phansi iqembu esidlala lalo. Siyakwazi kumele sibahloniphe kodwa singangena enkundleni kumele sincintise ukuze sinqobe emdlalweni wangoMgqibelo.”
Komunye umdlalo wangeSonto iqembu leBlack Rhinos lizadlala leleCaps United ngase Sakubva.
Limidlalo yomithathu yimidlalo eyadluliselwa phambili nyakenye, imbangela kuyikuba amaqembu lawa ayelabadlali kanye lenkokheli ababetholakale belomkhuhlane weCOVID-19.