Inhlanganiso elwela ilungelo lentathelizindaba eye Media Institute of Southern Africa (MISA) Zimbabwe isilobele umholi womsakazo we Zimbabwe Broadcasting Cooperation (ZBC) icela ukuba amabandla wonke ezombusazwe aphiwe amathuba alingeneyo okuphuma emsakazweni lo ngesikhathi sokhetho lwama by elections.
Lokhu kenzakala uhulumende esephawule umsakazo omutsha othiwa AzamTV.
Encwadini elotshelwe umholi we ZBC u Adelaide Chikunguru, I MISA Zimbabwe ithe kulandela ukhetho luka 2018, idale le High court lenhlanganiso ezazikhangela ukhetho lolu IZBC yakhuthazwa ukuba iphe amabandla ezombusazwe wonke ithuba lokutsho imbiko yawo ebantwini, ibuza ukuba kuyini osekwenziwe ukulandela lokhu?
Isiphathamandla seMisa Zimbabwe, uMnu Nqaba Matshazi utshele iStudio 7 ukuthi balobe lincwadi besithi kumele iZBC yenze umsebenzi wayo ingelacele elisekelayo ngesikhathi sokhetho.
“Esikukhuthaza I ZBC yikuthi benze okukhulunywa ngu mthetho ukuthi I ZBC kumele ivulele wonke umuntu ithuba lokukhuluma afuna ukukwenza. Kumabandla amathathu amakhulu sikhangelele ukuthi baphiwe amathuba alinganayo," kutsho uMatshazi.
Uphinde wathi encwadimi abayilobele iZBC bayikhumbuze ngesinqumo se High Court esaphiwa ngu Mahluleli u Joseph Mafusire esokuba iZBC le Zimpapers zephula isisekelo sombuso welizwe ngokunaphi uzulu ilungelo lokukhuluma okusenhliziyweni zakhe ngesikhathi sokhetho luka 2018.
“ Esikubonayo yikuthi IZBC isebenza engani isebenzela I ZANU PF. Sifuna ukuthi sikhangele okwaphuma emthethwandaba. UMahluleli wathi ZBC kayiphanga amathuba ebantwini bonke abakhankasayo," kutsho uMatshazi.
IMISA iphinde yathi iSADC kumazwi ayo ngemva kokhetho luka 2018 yaveza sobal ukuba iZBC yasekela ibandla elilodwa iphazamisa umthetho we Electoral Act lemigoqo ye SADC Principles and Guidelines Governing Democratic Elections.
Imizamo yokuthola icele le ZBC ngaloludaba yehlule, kodwa abe MISA Zimbabwe bathi kayikaphendulwanga incwadi yabo.
Kunjalo nje, umphathintambo wezokwethulwa kwemibiko, uNkosikazi Monica Mutsvangwa izolo uphawule ngokusemthethweni umsakazo omutsha othiwa yi AzamTV.
Lumsakazo uzakuba lezititshi kumbe ama channel aqala kukhulu esiyafika kukhulu elilamatshumi amathathu. Lumskazo ubikwa uphansi kwenkampani ye Blue Ribbon njalo abafuna ukubukela bazahlawula amadola eMelika amahlanu kumbe alitshumi lanhlanu kusiya ngokuthi umuntu uyabe ekhethe ziphi inhlelo.