Iqembu le Hwange libe ngutshiki lobhanqa 0 ka 0 lele Ajax Hotspurs emdlalweni oqhutshelwe enkundleni ye White City namhla emini.
Iqembu le Chipangano belinqobe kuyo yonke imidlalo ebeliyidlale phambilini kwalo owanamhla njalo
Umqeqetshi weqembu le Hwange uBongani Mafu ukhale ngamathuba abafana bakhe abehluleke ukuwasebenzisa.
Namhla sikhuthe amathuba amanengi kakhulu njalo nxa ukhuthe amathuba awutholi impumela enhle yikho kumele siyesebenza ukuze senelise ukusebenzisa amathuba esiwatholayo.
Impumela yanamhlanje itshiye iqembu le Hwange lilemiklomelo eyisikhombisa ngemva kwemidlalo emithathu.
Umqeqetshi weqembu le Ajax Hotspurs uBoga Ndebele yena uthe ujabulele ukuba bayenelise ukuvikela isango labo.
Kumidlalo yethu yonke ebesesiyidlalile besihlala sihlohlwa kodwa namhla kasihlohlwanga okutshengisa ukuba kulengqubela phambili.
Elinye iqembu lalo eliphunyukwe yimiklomelo okwakuqala kumidlalo yalonyaka ngele Ratanang lona elibe ngutshiki lobhanqa 1 ka 1 lele Quality Foods enkundleni ye Luveve.
Limpumela itshiye lalo iqembu le Ratanang lilemiklomelo eyisikhombisa ngemva kwemidlalo emithathu.
Kweminye imidlalo edlalwe namhla iqembu le Mountain Climbers libe ngutshiki lobhanqa 1 ka 1 lele Mosi Rovers, kube lempumela efanayo phakathi kwe Casymine le CIWU lazo eziqede kuyi 1 ka 1 kwathi lomdlalo obuphakathi kwe
Bosso90 le Mainline lawo uphele kuyi 1 ka 1.
Kusasa ngeSonto iqembu le Indosakusa lizadlala lele Emakhandeni ngase Luveve ngehola letshumi lambili kuthi iqembu le Zimbabwe Saints lizadibana lele Talen Vision ngehola lesithathu emini enkundleni ye White City.
Your browser doesn’t support HTML5
Udaba Silethulelwa nguJoseph Njanji