Izakhamizi zeGwanda sezidlela evalweni kulandela ukuhlaselwa ngamasela ahlome ngamahloka kanye lamabhemba athathela uzulu imali abuthe okuthengiswayo ezitolo. Kuviki edlulileyo bahlasele eSukwe lapho abatshontshe imota. UAlbert Ncube usipha loludaba.
Izakhamizi esixoxe lazo zithi azisabuquthi ubuthongo kulezinsuku ngenxa yezigebengu lezi ezihlasela ebusuku lapho inengi labantu lilele.
UMnu. Tommy Francis Ncube oyisakhamuzi seSukwe kuWard 18 eGwanda South, oleminyaka yokuzalwa efika phose amatshumi ayisitshiyangalombili 79, ngomunye walabo abahlaselwe yizigebengu kuviki edlulileyo.
UNcube uthi waphaphama ebusuku esizwa inkomo sezingene ekhaya.
Ngemva kokuhlaselwa lokhu uMnu. Ncube usele eselelihlo elilodwa kukanti imota yakhe lokhu ingakabonakali.
UMnu Gabrial Moyo oyisakhamuzi seMawane KuWard 13 uthi kuyadingeka ukuthi inkamba zamapholisa zakhelwe bucwadlana lezakhamizi ukuze lapho behlaselwa babikele amapholisa ngokuphangisa.
UMnu Miclas Ndlovu ukhansila kaWard 13 eGaranyemba uthi osomabhizimusi kanye lezakhamizi bakhathazeke kakhulu ngalezizehlakalo zobugebengu.
Kungakho uNdlovu uthi sebenxuse abatsha ukuthi basebenze njengamapholisa ezigaba ukuthi lobubugebengu bunqotshwe.
Izigebengu lezi zihlasele njalo ezitolo zeSamlodi kuyonale inyanga.
Isikhulumeli samapholisa eZansi yemaNdebeleni uNkosikazi Loveness Mangena kaphendulanga imbuzo esimthumele yona ngaloludaba.
Your browser doesn’t support HTML5
Udaba Silethulelwa ngu Albert Ncube