Kusele kumi iqembu leHwange lele Arenel Movers kumncintiswano we Southern Region Division One Wafa Wafa Tournament.
Sifezekile isifiso sikamqeqetshi weqembu le Arenel uKudzi Mhandire yena owavele watsho ekuqaleni komncintiswano we Wafa Wafa ukuba injongo yabo ngeyokuba bafinyelele kufinal.
Ekhuluma ngemva kokuba iqembu lakhe selinqobe ele Indlovu Iyanyathela 6 ka 5 ngemva kokutshaywa kwembekwa, uMhandire uthe bazazama ngakho konke okusemandleni abo ukuba bayiphakamise inkezo.
“Thina sijabulile ukuthi sesiku final. Esikukhangeleleyo yikuthi siyencintisa njalo singancintisa kuhle sinqobe kungathabisa imuli yethu ye Arenel.
Sizazama ukuthi senze konke esikwenelisayo ukuthi siphumelele,” kutsho uMhandire.
Isikhathi besidliwe ngumangoye amaqembu womabili engenelisanga ukulitshayela emambuleni.
Ku semi – final yesibili iqembu le Hwange litshaye ele Bosso 90 nge 1 ka nya njalo ohlohlele abafana be Chipangano ngumdlali owake wadlala isikhathi eside kusigaba se Premier Soccer League edlalela iqembu le Chicken Inn uThabani Goredema.
Umqeqetshi weqembu le Hwange uBongani Mafu uthi kuzamele babophe ziqine ukuze banqobe iqembu le Arenel.
“Sibona angathi sizathola umdlalo onzima kakhulu ngoba leliyana elinye iqembu liqinile ngoba linqobe ele Indlovu Iyanyathela, iqembu lamasotsha.
Kuzamele sibuyele ekhaya siyesebenza kakhulu ukwenzela ukuthi umdlalo lo – ozadlalelwa eHwange – ube mnandi kakhulu,” kutsho uMafu.
Akukaziwa ukuba ifinal izadlalelwa ngaphi kodwa imidlalo ye semi – final iqhutshelwe enkundleni ye White City ngempelaviki eyedluleyo njalo uMafu uthi yena labantu base Hwange bengajabula kakhulu nxa ifinal ingadlalelwa khonale emalahleni.
Umncintiswano we Wafa Wafa ubuvulela indlela imidlalo yeligi njalo abe Southern Region Division One Soccer League sebekhuphe uhlelo olokuba amaqembu azadlala njani kusukela mhla zilitshumi lanhlanu kuyonale inyanga ka Zibandlela.
Umqeqetshi weqembu le Indlovu Iyanyathela uClement Chimimba uthi umncintiswano we Wafa Wafa ubaphathise kakhulu ukuthi balungiselele ukuqala kwemidlalo yeligi.
“Isibonisile ikakhulu lapho esisilela khona lalapho esiqine khona. Nxa sesiqalisa isizini siyabe sesikwazi ukuthi kumele silungisise ngaphi. Lumncintiswano usiphathise kakhulu,” kutsho uChimimba.
Kulamaqembu alitshumi lathoba munwe munye kusigaba se Southern Region Division One lonyaka njalo ngoMgqibelo kuhlelwe ukuba kudlalwe imidlalo eyithoba minwe mbili kuthi ngeSonto kuzakuba lomdlalo owodwa.
Your browser doesn’t support HTML5
Udaba Silethulelwa ngu Joseph Njanji