Inengi lithi ukuhambahamba kwabantu kusiya kukhefu lekhisimusi ikakhulu okwalabo abazavela emazweni aphetsheya kulakho ukumemethekisa ngamandla leligciwane.Inengi lezizalwane zakuleli ezisebenzela emazweni abalisa eleSouth Africa laseBotswana lingena liphume elizweni okungekho emthethweni njalo lingahlolwanga.
Izakhamizi esixoxe lazo zithi sezidlela evalweni kulandela umbiko okhitshwe kuliviki ngumphathintambo obona ngezempilakahle njalo engumsekeli kaMongameli welizwe uMnu Constantino Chiwenga oveze ukuthi umkhakha wecoronavirus omutsha omemetheka ngesiqubu oweOmicron usukhona kuleli.
Uzulu esixoxe laye uveze ukukhathazeka ngalumbiko esithi lumkhakha ulakho ukumemetheka ngamandla ngalesisikhathi kulandwa ikhefu lekhisimusi lapho abantu abazavakatshelana khona.
UNkosikazi Matilda Dube oyisakhamuzi seVokola eInsiza South uthi udidekile engqondweni ngalumkhakha omutsha wegciwane le coronavirus.
“Kathesi ngekhefu locale siyezwa bayeza abantwana bevela eBotswana leSouth Africa lapho osuzwakalela khona asikunanzeleleni bakithi lapho esiya khona asigqokeni amamask lokhuyana okokuthi sixhawulane sokwadlula ngoba kathesi ngekhefu ungasaboni umntanakho kuba buhlungu.”
Amazwi la agcizelelwe nguMnu Gabariel Moyo isakhamuzi seMawane eGwanda.
“Abantu sebekhathazekile kakhulu ngeCovid leyi esibuya ngoba nxa iLockdown siqala so kutsho abantu abanengi sebezahlala ezindlini, kulokusikhathaza okunzima njalo isiphambanisa kakhulu emsebenzi yabantu isizasilethela udubo olukhulu funa iqhubeke izikolo sezingavalwa singavulwa njengalokhu okwenzakalayo abantwana bengsafunda.”
UMnu Promise Tshabangu uSobhuku weSitezi uthi umkhuhlane lo ulakho ukumemetheka ngamandla ngoba inengi lingasalandeli iziqondiso zokuzivikela.
“Abantu kufuneka ukuthi ngabe bayafundiswa, balandelelwe, ngoba abantu abalandeli izinqumo zakhona ikakhulu ukufaka amamask vele abafaki.Uyafika emavikilini , emabhawa ufice abantu bengagqokanga izinto zonke zonalezi.Umkhuhlane lo uzamemetheka ubulale isigaba sonke, ikakhulu abantwana ezikolo ngoba abantwana besikolo yibo abazamemethekisa umkhuhlane lo bazasuka lawo khonale bebuye bezowuthela emagumeni la.”
UKhansila kaWard 13 eGaranyemba uMnu Miclas Ndlovu uthi bakhathazekile ngalabo abangaphandle kwelizwe abazabuya kukhefu.
“Bazabuya bekuthwele bangababili bathathu kumbe oyedwa njengoba kuthiwa umkhakha wakhona umemetheka ngokuphangisa sizwa sisethuka ukuthi kuzakwenzakalani , siyakhuthazwa kakhulu abangahlatshwanga lokuthi silandele imithetho esiyanikwayo.Eqinisweni sithithibele kakhulu besesithaba ukuthi abantwabethu sesizabayamukela kathesi nanku ke.”
Abezempilakahle baqhube umkhankaso kuviki edluleyo edolobheni leGwanda lapho abakhuthaze uzulu ukuthi engekethisi alandele iziqondiso zokuvikela umkhuhlane weCovid, nangu uNkosikazi Siqalisile Masuku.
“Sikhangele umkhuhlane weCovid 19, sikhumbuzana ukuthi uvikelwa njani lokuthi sikhuthaze abanye ukuthi bayehlaba iVaccine sikhangelele lakathesi ukuthi uhulumende sevulile wathi abaleminyaka engu 16 bahlatshwe, abantu ababuye esibhedlela bezohlatshwa.”
Bedlula amakhulu amabili 219 asebebanjwe igciwane leCoronavirus esigabeni se Matabeleland South selokhu kuqale liviki.
Your browser doesn’t support HTML5
Udaba Silethulelwa nguAlbert Ncube